Kuvayt amiri Shayx Saboh al-Ahmad al-Jobir as-Saboh 91 yoshida vafot etdi. Bu haqda Meduza xabar berdi.
Shayx AQShda vafot etgan. U AQShga 2020-yilning iyul oyida tibbiy ko‘rikdan o‘tish uchun borgandi. Keyinroq shayx muvaffaqiyatli operatsiya o‘tkazgani va u reabilitatsiyada ekanligi ma’lum qilingan.
Kuvaytning yangi amiri marhumning o‘gay ukasi Navaf al-Ahmad al-Jobir as-Saboh bo‘ladi. Shayx Saboh AQShda davolangan so‘nggi oylar davomida uning ukasi davlat rahbari lavozimini qisman bajarib kelgan.
Shayx Saboh 2006-yilda taxtga o‘tirgan, ungacha esa bir necha o‘n yil davomida Kuvayt Tashqi ishlar vazirligiga rahbarlik qilgan. U ayollar huquqlarini, OAV va yig‘ilishlar erkinligini kengaytirish yo‘nalishlarida demokratik islohotlarni amalga oshirgan.
Shayx Saboh amaldagi ikkinchi eng keksa davlat rahbari edi. Amaldagi eng keksa davlat rahbari sifatida 94 yoshli Buyuk Britaniya qirolichasi Yelizaveta II qolmoqda.
Eslatib o‘tamiz, Buyuk Britaniya qirolichasi Yelizaveta II 21-aprel kuni 94 yoshga to‘ldi. U tug‘ilgan kunini qarindoshlari bilan videoaloqa orqali nishonlagandi.
Izoh (0)