Jahon sog‘liqni saqlash tashkiloti bosh kotibi Tedros Gebreyesusning 28-sentabrdagi brifingida aytishicha, kelasi olti oy ichida kam va o‘rta daromadli mamlakatlar COVID-19 uchun 120 million dona arzon, sifatli va tezkor testlarni qabul qilib oladi. Bu haqda tashkilot axborot xizmati ma’lum qildi.
“Biz COVID-19’ni qanchalik tez aniqlasak, shunchalik tezroq xavfli virusni yuqtirgan odamlarni ajratish va davolash choralarini ko‘ramiz”, – dedi JSST rahbari.
Tedros Gebreyesusning so‘zlariga ko‘ra, yangi testlar ishonchli natijani avvalgidek soatlab yoki kunlab emas, balki taxminan 15-30 daqiqada olish imkonini beradi. Shu bilan birga, yangi testlar arzon va u murakkab texnik jihozlarni talab qilmaydi.
“Bu tibbiy laboratoriyalar va mutaxassislar mavjud bo‘lmagan, yoki bunday joyga borish qiyin bo‘lgan hududlarda sinovlarni ko‘paytirishga imkon beradi”, – dedi Gebreyesus.
Endi bitta tezkor test narxi taxminan besh dollarni tashkil etadi, bu avvalgi avlod sinovlaridan ancha arzon. Kelajakda JSST narxlarning yanada pasayishini kutmoqda
JSST rahbarining aytishicha, tez kunlarda tezkor testlarni yetkazib berish to‘g‘risida bitim ikki ishlab chiqarish kompaniyasi va Bill hamda Melinda Geyts fondi tomonidan imzolangan.
“Rasmiy ravishda tasdiqlangan shartnomalarni imzoladik, loyihani amalga oshirish uchun mablag‘ oldik va endi ushbu testlarni to‘liq sotib olish uchun zarur bo‘lgan mablag‘ni yig‘ishimiz kerak”, – dedi tashkilot rahbari.
Avvalroq JSST koronavirus bilan bog‘liq o‘lim holatlari rasmiy ma’lumotlarda qayd etilganidan ko‘proq ekanini ma’lum qilgandi
Izoh (0)