Буюк Британия ва Канада Беларусда президент сайловининг сохталаштирилгани ва инсон ҳуқуқларининг бузилгани сабабли Александр Лукашенко ва унинг одамларига қарши санкция жорий қилди. Бу ҳақда Meduza хабар берди.
Буюк Британия ҳукуматининг маълум қилишича, Александр Лукашенко режими сайлов сохталаштирилганидан кейин мухолифат вакиллари, ОАВ ва Беларусь халқига нисбатан содир этилган инсон ҳуқуқлари бузилиши учун жавобгар ҳисобланади. «Халқаро ҳамжамиятнинг кўп сонли чақирувларига қарамасдан, Лукашенко мухолифат билан мулоқот олиб боришдан бош тортди ва бунинг ўрнига ўзининг шафқатсиз зўравонлигини икки баравар оширишга қарор қилди», — дейилади баёнотда.
Буюк Британия томонидан жорий қилинган санкциялар ўз ичига мамлакатга киришга тақиқ ва активларни музлатишни олади. Александр Лукашенкодан ташқари, санкциялар остига унинг катта ўғли Виктор, Беларусь президенти администрацияси раҳбари Игорь Сергеенко, ички ишлар вазири Юрий Караев, унинг ўринбосарлари Александр Барсуков ва Юрий Назаренко, Ички ишлар вазирлиги ички қўшинлари қўмондони ўринбосари Казалбек Атабеков ва Минск милициясининг махсус топшириқлар бўлинмаси бошлиғи Дмитрий Балаба тушган.
Бунга ўхшаш тақиқ Канада томонидан ҳам жорий қилинди. Чекловлар қаторига мамлакатга киришга, санкциялар остидаги шахслар билан шартномалар тузишга тақиқлар кирган. Рўйхатга Буюк Британия ҳукумати томонидан санкция остига қўйилганлардан ташқари Минск полицияси раҳбари Иван Курбаков, Беларусь Марказий сайлов комиссияси раиси Лидия Ермошина ва унинг икки нафар ходими Елена Дмухайло ва Вадим Ипатов киритилган.
Август ойининг охирида Латвия, Литва ва Эстония Александр Лукашенко ва яна 29 нафар беларуслик мансабдорнинг ўз ҳудудларига киришини тақиқлаганди, 25 сентябрь куни эса бу рўйхат кенгайтирилди.
Беларусь Ташқи ишлар вазирлиги 29 сентябрь куни Болтиқ мамлакатларининг ҳар бирига нисбатан жавоб чораларини жорий қилинишини билдирди, бироқ айнан қандай чоралар кўрилишига аниқлик киритмади.
Европа Иттифоқи август ойидан буён беларуслик мансабдорларга қарши санкциялар тайёрлашни бошлаган, бироқ Туркияга қарши янги санкциялар қўллаётган Кипрнинг позицияси сабабли Беларусга қарши санкцияларни келишишнинг имкони бўлмаяпти.
Эслатиб ўтамиз, 23 сентябрь куни Александр Лукашенко яширинча инаугурация маросимини ўтказган ва расман Беларусь президенти лавозимида иш бошлаган. Бу эса мамлакатда норозиликларнинг янги тўлқини юзага келтирди.
Шундан сўнг Литва, Латвия, Эстония, Словакия, Украина, Германия, Канада, Польша, АҚШ, Швеция, Норвегия, Буюк Британия ва Европа Иттифоқи Лукашенкони Беларуснинг қонуний президенти сифатида тан олишдан бош тортди.
Беларусь мухолифати етакчиси Светлана Тихановская Александр Лукашенконинг Беларусь президентлиги лавозимига яширин инаугурациясига бағишланган видеомурожаат йўллаб, унда ўзини беларус халқининг ягона етакчиси деб атади.
Светлана Тихановская Франция президенти Эммануэль Макронга Александр Лукашенко режими билан мулоқотда воситачи бўлишни сўраб мурожаат қилди ва у билан Литвада учрашди.
Изоҳ (0)