Buxoro viloyati Buxoro tumanida 29-sentabr kuni Nexia-3 avtomobilining beton to‘siqqa urilib, ag‘darilib ketishi oqibatida haydovchining rafiqasi va farzandi halok bo‘ldi. Bu haqda Tergov departamenti xabar berdi.
Ma’lum qilinishicha, 2020-yilning 29-sentabr kuni soat 07:30 da 30 yoshli S.J. Nexia avtomashinasida Jondor—Buxoro yo‘nalishi bo‘ylab harakatlanib, Buxoro tumani “Rabotiqalmoq” MFY hududidan o‘tuvchi 4R-72 avtomobil yo‘lining 8-kilometrida avtomashina boshqaruvini yo‘qotgan. Mashina yo‘lning harakat yo‘nalishi bo‘yicha o‘ng tomonida joylashgan beton to‘siqqa old qismi bilan urilishi oqibatida bir necha marotaba ag‘darilib ketgan.
Natijada avtomashinada bo‘lgan yo‘lovchilar — haydovchining turmush o‘rtog‘i, 29 yoshli B.X. hamda uning voyaga yetmagan farzandi, 7 yoshli K.T. hodisa joyida vafot etgan.
Mazkur holat yuzasidan Buxoro viloyat IIB huzuridagi Tergov boshqarmasi tomonidan O‘zbekiston Respublikasi Jinoyat kodeksining 266-moddasi 3-qismi “a” bandi (odamlar o‘limiga sabab bo‘lgan transport vositalari harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib, dastlabki tergov harakatlari olib borilmoqda.
Mavzuga doir:
- Andijonda Volvo yuk mashinasi ikki nafar qizaloqni bosib ketib, xonadonlarning biriga borib urildi
- Namanganda IJ-2715 rusumli avtomobil beton to‘siqqa urilishi oqibatida uning yo‘lovchisi halok bo‘ldi
- Farg‘onada Matiz haydovchisi beton to‘siqqa urilishi oqibatida vafot etdi
- Farg‘onada Nexia traktor tirkamasiga urilishi oqibatida 1 kishi halok bo‘ldi, 3 kishi shifoxonaga yotqizildi
Izoh (0)