Namanganda 2021-yili 60-xalqaro “Gullar bayrami” o‘tkaziladi. Bu haqda viloyat hokimi Shavkatjon Abdurazzoqov mahalliy gulchilar bilan uchrashuvi davomida ma’lum qildi, deya xabar beradi “Daryo” muxbiri Azizbek Abduvaliyev.
2020-yil pandemiya sababli ushbu tadbir qoldirilgandi. Shunga qaramay, namanganlik gulchilar 5 million dona gul ko‘chati ekishga ulgurgan.
“Kelgusi yili bu raqam ikki baravarga ko‘payib, 10 million donaga yetkaziladi. Yubiley festivalini oldin rejalashtirilgani kabi xalqaro miqyosda, chet ellik gulchilarni ham jalb etgan holda o‘tkazamiz. Bunga hozirdanoq tayyorgarlikni boshlashimiz, Namangan shahrini nomiga monand ko‘rinishga keltirishimiz zarur”, — dedi viloyat rahbari.
Viloyat gulchilikni rivojlantirish markazida bo‘lib o‘tgan muloqot davomida Shavkatjon Abdurazzoqov Turkiyaning Istanbul shahrida yo‘lga qo‘yilgan tajribani tilga olib o‘tdi. Bu yerda har yili shaharni turfa gullarga burkash va obodonlashtirish uchun davlat budjetidan salmoqli mablag‘ ajratiladi.
“Namanganda ham gulchilikni rivojlantirish uchun maxsus markaz tashkil etildi, gulchilarimizga issiqxonalar uchun yer ajratilib, gaz quvurlari tortib kelindi. Endi viloyat ahli va mehmonlar bu urinishlarimiz samarasini o‘z ko‘zlari bilan ko‘rishi kerak”, — dedi viloyat hokimi.
Ma’lumot uchun, Namanganda 1961-yildan beri an’anaviy “Gullar bayrami” o‘tkazib kelinadi. Oxirgi yillarda g‘oliblarga Spark avtomobillarini topshirish odat tusiga kirgan.
Izoh (0)