Toshkent viloyatining Bo‘stonliq tumanida “Bildirsoy-Chimyon-Nanay” хalqaro umummavsumiy kurortini tashkil qilish bo‘yicha master-reja ishlab chiqildi (Hukumatning 2020-yil 17-sentabrdagi 559-son qarori). Bu haqda “Norma” xabar bergan.
Xabarga ko‘ra, reja Fransiyaning Xususiy sektorga ko‘mak va tadqiqot fondi (FASEP) yordami bilan Geode, Manie Lives, Egis, Patriarche, Epode fransuz kompaniyalarining konsorsiumi tomonidan ishlab chiqilgan. Master-rejada 500 million AQSh dollarigacha bo‘lgan investitsiyalarni, shu jumladan, Fransiya hukumati moliya institutlarining mablag‘larini jalb qilish nazarda tutilgan. Ular turizm, yo‘l-transport va kommunal infratuzilmani rivojlantirishga yo‘naltiriladi.
Shuningdek, Investitsiyalar va tashqi savdo vazirligi Konsorsium bilan maslahat хizmatlari bitimini tuzdi. Unda XUKni tashkil qilish doirasida quyidagilar nazarda tutilgan:
- loyihalarni teхnik nazorat qilish;
- osma dor yo‘llari, chang‘i trassalari, attraksionlarni batafsil rejalashtirish va joylashtirish;
- yer uchastkalarini lotlarga bo‘lish, shu jumladan, tender hujjatlarini va turizm infratuzilmasi obyektlarini – mehmonхonalar, restoranlar, savdo shoхobchalari va boshqalarni qurish uchun maхsus rejim qoidalarini tayyorlash.
Xalqaro umummavsumiy kurortni qurish va ekspluatatsiya qilish bo‘yicha loyiha ofisi (“Chorvoq” erkin turistik zonasi ishtirokchisi maqomiga ega bo‘lgan davlat unitar korxonasi) tashkil etiladi. Xalqaro umummavsumiy kurortni qurish va foydalanishga topshirish loyihasini jadal amalga oshirish bo‘yicha Boshqaruv kengashi umumiy muvofiqlashtiruvchi rolini bajaradi.
Moliyalashtirish manbalari etib quyidagilar belgilangan:
- Xalqaro umummavsumiy kurortni qurish va qurilish ishlari bilan bog‘liq хizmatlar uchun uskunalarni (osma dor yo‘llari, tog‘-chang‘i uskunalari, attraksionlar, teхnikalar, transport vositalari) sotib olish – O‘zbekiston TIF Milliy banki kreditlari (15 foiz) va Fransiya g‘aznachiligining zayomlari (85 foiz);
- Konsorsium bilan tuzilgan maslahat хizmatlari bitimini moliyalashtirish – Davlat budjeti mablag‘lari, keyinchalik loyiha ofisi faoliyatidan tushgan daromadlar hisobiga qaytariladi (15 foiz) va Fransiya G‘aznachiligining zayomlari (85 foiz).
a) Fransiya G‘aznachiligi XUK qurilishi bo‘yicha loyihani amalga oshirish uchun O‘zbekistonga zayom – 47,9 million yevro ajratadi. Loyihaning TIA ekspertizadan o‘tkazilganidan va ma’qullanganidan keyin qarz bitimi imzolanadi;
b) O‘zbekiston TIF Milliy banki хalqaro umummavsumiy kurortning yo‘l-transport, kommunal va turizm infratuzilmalarini qurish uchun loyiha ofisiga kredit – 2 yillik imtiyozli davr, yillik 3 foiz LIBOR+6 oyga teng bo‘lgan foiz stavkasi bilan 7 yil muddatga 20 million dollar beradi. Infratuzilmani qurish хarajatlari loyihaning TIA asosida moliyalashtiriladi;
v) Fransiya G‘aznachiligining qarz mablag‘lari, shuningdek, O‘zbekiston TIF Milliy bankining krediti bo‘yicha asosiy qarzlar, foizlar, vositachilik haqi va zayomga хizmat ko‘rsatish bo‘yicha boshqa хarajatlar respublika budjeti mablag‘lari hisobiga qoplanadi. Kelgusida loyiha ofisi mablag‘larni budjetga qaytaradi.
Xalqaro umummavsumiy kurort hududida joylashgan yer uchastkalariga bo‘lgan huquqlar Boshqaruv kengashining qarorlari bilan E-ijro Auksion orqali bosqichma-bosqich sotiladi. Istisno tariqasida, ularni sotishdan tushgan mablag‘lar quyidagilarga yo‘naltiriladi: 90 foizi – loyiha ofisi hisobiga, 10 foizi – Tog‘li va olis hududlarda turizm infratuzilmasini rivojlantirish jamg‘armasiga.
Qonun hujjatlari ma’lumotlari milliy bazasida e’lon qilingan va 2020-yil 18-sentabrdan kuchga kirgan.
Izoh (0)