Turkiyadagi ko‘chalarining birida noma’lum sabablarga ko‘ra mashinasining yukxonasida tarvuz sotayotgan erkakning suratlari internetda keng tarqaldi. Mashina tashqi ko‘rinishidan Lamborghini Aventador, deb xabar beradi CARakoom.
Ma’lumotlarga ko‘ra, mashinadagi tarvuzlar oddiy bo‘lgan — bir kilogrammi taxminan 60 sentdan. Aftidan sotuvchi 150 kilogrammga yaqin tarvuz olib kelgan bo‘lib, undan qoladigan foyda 90 dollarni tashkil etadi. Lamborghini Aventador’ning ikkilamchi bozordagi narxi esa 150 ming dollardan 400 ming dollargacha.
Tarvuz sotuvchining atrofida tezda ko‘pchilik to‘planib, Italiyada yaratilgan mashinani tomosha qilishga tushib ketgan.
Muxbirlar voqea joyiga yetib kelganida, Lamborghini’ning sirli egasi superkariga o‘tirib olib, biror nima deyishda bosh torgan. U hatto qolgan tarvuzlarni trotuarga tashlab ketgan. Avtomobil raqamini qidirish natijasida Lamborghini Antaliya janubida ro‘yxatdan o‘tgani aniqlangan.
Hürriyet Daily News nashri xabar berishicha, turk politsiyachilari erkakni 165 dollar jarimaga tortgan. Aniqlanishicha, erkak eronlik bloger bo‘lib chiqqan. U tarvuz bilan savdo qilishini ijtimoiy tarmoqlar orqali efirga uzatgan.
Unga “transport vositasidan haydovchilik guvohnomasida ko‘rsatilmagan maqsadda foydalanish” ayblovi qo‘yilgan. Bloger jarimani to‘lab bergach qo‘yib yuborilgan, ammo 15 kunga guvohnomasidan mahrum etilgan.
Mutaxassislarning ta’kidlashicha, Turkiyada minilgan Lamborghini Aventador mashinasi 5 mln turk lirasi (672 ming dollar) atrofida turadi.
Izoh (0)