Фото: Туркияда Lamborghini эгаси ўз суперкари юкхонасида тарвуз сотмоқда

Туркиядаги кўчаларининг бирида номаълум сабабларга кўра машинасининг юкхонасида тарвуз сотаётган эркакнинг суратлари интернетда кенг тарқалди. Машина ташқи кўринишидан Lamborghini Aventador, деб хабар беради CARakoom.

Маълумотларга кўра, машинадаги тарвузлар оддий бўлган — бир килограмми тахминан 60 сентдан. Афтидан сотувчи 150 килограммга яқин тарвуз олиб келган бўлиб, ундан қоладиган фойда 90 долларни ташкил этади. Lamborghini Aventador’нинг иккиламчи бозордаги нархи эса 150 минг доллардан 400 минг долларгача.

Тарвуз сотувчининг атрофида тезда кўпчилик тўпланиб, Италияда яратилган машинани томоша қилишга тушиб кетган.

Мухбирлар воқеа жойига етиб келганида, Lamborghini’нинг сирли эгаси суперкарига ўтириб олиб, бирор нима дейишда бош торган. У ҳатто қолган тарвузларни тротуарга ташлаб кетган. Автомобиль рақамини қидириш натижасида Lamborghini Анталия жанубида рўйхатдан ўтгани аниқланган.

Hürriyet Daily News​ нашри хабар беришича, турк полициячилари эркакни 165 доллар жаримага тортган. Аниқланишича, эркак эронлик блогер бўлиб чиққан. У тарвуз билан савдо қилишини ижтимоий тармоқлар орқали эфирга узатган.

Унга «транспорт воситасидан ҳайдовчилик гувоҳномасида кўрсатилмаган мақсадда фойдаланиш» айблови қўйилган. Блогер жаримани тўлаб бергач қўйиб юборилган, аммо 15 кунга гувоҳномасидан маҳрум этилган.

Мутахассисларнинг таъкидлашича, Туркияда минилган Lamborghini Aventador​ машинаси 5 млн турк лираси (672 минг доллар) атрофида туради.