O‘zbekiston Senatining 7-avgust kuni ochilgan oltinchi yalpi majlisida Senat raisi Tanzila Norboyeva O‘zbekiston Qahramoni, Qoraqalpog‘iston Jo‘qorg‘i Kengesi raisi, senator Musa Yerniyazovni xotirladi, deya xabar bermoqda parlament yuqori palatasi axborot xizmati.
“U kishining vafoti ayniqsa Senat uchun katta yo‘qotish bo‘ldi. Boisi, Musa Tajetdinovich mamlakatimizda ikki palatali parlament tashkil etilgandan beri Senat raisining o‘rinbosari sifatida samarali faoliyat yuritib kelayotgan edi. Shu bilan birga, u kishining sa’y-harakatlari bilan o‘tgan davrda Qoraqalpog‘iston shahar va tumanlari, ovullari qiyofasi yangilandi. Ayniqsa, taraqqiyotimizning yangi davrida Prezidentimiz tomonidan ilgari surilayotgan g‘oya va tashabbuslarni Qoraqalpog‘istonda bekami-ko‘st amalga oshirish borasida ham kuch-g‘ayratini ayamadi. Birgina Mo‘ynoqdagi bunyodkorlik ishlarining o‘ziyoq fikrimizga dalil bo‘la oladi. Orol fojiasi oqibatlarini yumshatish, mintaqa aholisining turmush sharoitini yaxshilash borasida ham kuyinchaklik bilan ishladi”, — dedi Norboyeva.
Senat raisining qayd etishicha, u qator jamoatchilik tuzilmalaridagi hamda hukumat tarkibidagi ko‘p yillik faoliyati davrida, qolaversa, Senatdagi faoliyati davomida Musa Yerniyazovning salohiyatli va ulkan tajribaga ega rahbar, mulohazali, vazmin, jonkuyar, g‘amxo‘r inson sifatidagi fazilatlariga ko‘p bora guvoh bo‘lgan.
“O‘ylaymanki, siz, hurmatli senatorlar va majlisimiz ishtirokchilari ham, qolaversa, Musa og‘a bilan ishlagan va yaqin maslakdosh bo‘lgan barcha insonlar u kishining ana shu fazilatlarini yaxshi eslaydi. Musa Yerniyazovning oila a’zolari va yaqinlariga, Jo‘qorg‘i Kenges deputatlari va qoraqalpog‘istonlik senatorlarga, qolaversa, butun o‘zbek, qoraqalpoq eliga yana bir bor chuqur hamdardlik bildiramiz. Musa Tajetdinovich Yerniyazovning yorqin xotirasi Senat tarixida mangu qoladi!”, — deya qo‘shimcha qildi Tanzila Norboyeva.
Senat axborot xizmatining qayd etishicha, yalpi majlisning rasmiy qismiga o‘tishdan oldin Musa Yerniyazovning va koronavirus infeksiyasidan vafot etgan boshqa o‘zbekistonliklar xotirasiga bir daqiqalik sukut saqlangan.
Mavzuga doir:
- Qoraqalpog‘iston Jo‘qorg‘i Kengesi raisi Musa Yerniyazov vafot etdi
- Qoraqalpog‘iston SSV Musa Yerniyazovning kasalligi qanday kechgani haqida ma’lumot berdi. U bir oy og‘ir ahvolda bo‘lgan
- O‘zSSV Musa Yerniyazovda koronavirus 24-iyunda tasdiqlanganini ma’lum qildi. Iyul boshida uning kasalligi yashirilgan edi
- Shavkat Mirziyoyev Musa Yerniyazov qabrini ziyorat qildi
- Shavkat Mirziyoyev: “Musa Yerniyazovning qutlug‘ nomi ko‘chalar, xiyobonlarga beriladi”
Shuningdek, 19-iyul kuni Chilonzor tumani Sanitariya-epidemiologik osoyishtalik markazi bakteriologiya laboratoriyasi mudiri 62 yoshli Marhabo Ahmedova, 22-iyulda Bosh prokurorning sobiq o‘rinbosari, Qoraqalpog‘iston prokuraturasida bo‘lim boshlig‘i bo‘lib ishlayotgan 66 yoshli Hakimbay Xalimov koronavirus asoratlaridan vafot etgani xabar qilingan. 31-iyul kuni Jinoyat ishlari bo‘yicha Toshkent viloyat sudi sudyasi, 53 yoshli Xayriddin Shermuhamedov, 1-avgust kuni Toyloq tumani prokurori Farhod Abduxoliqov vafot etgani xabar berildi. Biroq ushbu sakkiz holat haqida SSV tomonidan ayni vaqtgacha axborot berilmagan.
Izoh (0)