Ўзбекистон сенаторлари Муса Ерниязов ва коронавирусдан вафот этган бошқа барча ўзбекистонликлар хотираси учун бир дақиқа сукут сақлади

Ўзбекистон Сенатининг 7 август куни очилган олтинчи ялпи мажлисида Сенат раиси Танзила Норбоева Ўзбекистон Қаҳрамони, Қорақалпоғистон Жўқорғи Кенгеси раиси, сенатор Муса Ерниязовни хотирлади, дея хабар бермоқда парламент юқори палатаси ахборот хизмати.

«У кишининг вафоти айниқса Сенат учун катта йўқотиш бўлди. Боиси, Муса Тажетдинович мамлакатимизда икки палатали парламент ташкил этилгандан бери Сенат раисининг ўринбосари сифатида самарали фаолият юритиб келаётган эди. Шу билан бирга, у кишининг саъй-ҳаракатлари билан ўтган даврда Қорақалпоғистон шаҳар ва туманлари, овуллари қиёфаси янгиланди. Айниқса, тараққиётимизнинг янги даврида Президентимиз томонидан илгари сурилаётган ғоя ва ташаббусларни Қорақалпоғистонда беками-кўст амалга ошириш борасида ҳам куч-ғайратини аямади. Биргина Мўйноқдаги бунёдкорлик ишларининг ўзиёқ фикримизга далил бўла олади. Орол фожиаси оқибатларини юмшатиш, минтақа аҳолисининг турмуш шароитини яхшилаш борасида ҳам куйинчаклик билан ишлади», — деди Норбоева.

Сенат раисининг қайд этишича, у қатор жамоатчилик тузилмаларидаги ҳамда ҳукумат таркибидаги кўп йиллик фаолияти даврида, қолаверса, Сенатдаги фаолияти давомида Муса Ерниязовнинг салоҳиятли ва улкан тажрибага эга раҳбар, мулоҳазали, вазмин, жонкуяр, ғамхўр инсон сифатидаги фазилатларига кўп бора гувоҳ бўлган.

«Ўйлайманки, сиз, ҳурматли сенаторлар ва мажлисимиз иштирокчилари ҳам, қолаверса, Муса оға билан ишлаган ва яқин маслакдош бўлган барча инсонлар у кишининг ана шу фазилатларини яхши эслайди. Муса Ерниязовнинг оила аъзолари ва яқинларига, Жўқорғи Кенгес депутатлари ва қорақалпоғистонлик сенаторларга, қолаверса, бутун ўзбек, қорақалпоқ элига яна бир бор чуқур ҳамдардлик билдирамиз. Муса Тажетдинович Ерниязовнинг ёрқин хотираси Сенат тарихида мангу қолади!», — дея қўшимча қилди Танзила Норбоева.

Сенат ахборот хизматининг қайд этишича, ялпи мажлиснинг расмий қисмига ўтишдан олдин Муса Ерниязовнинг ва коронавирус инфекциясидан вафот этган бошқа ўзбекистонликлар хотирасига бир дақиқалик сукут сақланган.

Шунингдек, 19 июль куни Чилонзор тумани Санитария-эпидемиологик осойишталик маркази бактериология лабораторияси мудири 62 ёшли Марҳабо Аҳмедова, 22 июлда Бош прокурорнинг собиқ ўринбосари, Қорақалпоғистон прокуратурасида бўлим бошлиғи бўлиб ишлаётган 66 ёшли Ҳакимбай Халимов коронавирус асоратларидан вафот этгани хабар қилинган. 31 июль куни Жиноят ишлари бўйича Тошкент вилоят суди судьяси, 53 ёшли Хайриддин Шермуҳамедов, 1 август куни Тойлоқ тумани прокурори Фарҳод Абдухолиқов вафот этгани хабар берилди. Бироқ ушбу саккиз ҳолат ҳақида ССВ томонидан айни вақтгача ахборот берилмаган.