2020-yil iyul oyida “Levada-sentr” o‘tkazgan so‘rovnoma ishtirokchilarining 23 foizi Rossiya prezidenti Vladimir Putinga ishonishini ma’lum qildi. Bu haqda Meduza xabar bergan.
Respondentlarga 16 ta siyosatchi orasidan o‘zlari ishonadigan besh yoki olti nafarining ismini aytish so‘ralgan.
“Levada” ma’lumotlari bo‘yicha 2017-yil noyabr oyidan beri (so‘rovning ushbu muddatdan avvalgi natijalari keltirilmagan) Putinning ishonch reytinigi keskin pasayib bormoqda, goh-gohida bir yoki ikki pog‘onaga o‘sish kuzatiladi. 2017-yil noyabr oyida so‘rovnomada qatnashgan ishtirokchilarning 59 foizi Rossiya prezidentiga ishonishini ma’lum qilgandi.
60 foiz ishtirokchi Putinning prezident sifatidagi faoliyatini ma’qullashi, 33 foizi esa siyosatdan norozi ekanini bildirgan. 2000-yildan beri Putinning “Levada” so‘rovnomasidagi eng yuksak ishonch reytingi 2015-yilda kuzatilgan va o‘shanda ishtirokchilarning 87 foizi Rossiya prezidentiga ishonishini aytgandi.
So‘rovnoma 24—25-iyul kunlari telefon orqali o‘tkazilgan, unda yoshi 18 da yoki undan katta, jami 1617 nafar fuqaro ishtirok etgan.
2020-yil mart oyida Butunrossiya jamoatchilik fikrini o‘rganish markazi Putinga xalqning ishonchi reytingi 2006-yil yanvaridan beri rekord darajada past — 28,3 foiz ekanini bildirgan. 2019-yil yanvar oyida Putinga rossiyaliklarning 33,4 foizi ishonishini oydinlashgandi.
Ushbu markazning 2019-yil may oyidagi so‘rovnomasida qatnashganlarning 30 foizi muqobil javoblarsiz siyosatchilarga ishonch haqidagi savollarga (variant berilmagan) Putinning ism-familiyasini aytib javob bergan. Shundan keyin markaz ochiq savolning uslubini o‘zgartirib, “Vladimir Putinga ishonasizmi yoki yo‘q?” deya savol berib, so‘rovnoma o‘tkazishni boshlagandi.
2019-yil 30-iyulda “Levada-sentr” o‘tkazilgan so‘rovnomada rossiyaliklarning 38 foizi Vladimir Putinning amaldagi vakolati tugaganidan keyin qayta prezidentlikka saylanishiga qarshi ovoz bergandi. 2020-yil 21-iyunda agar Rossiya konstitutsiyasida bunga sharoit yaratilsa, Putin prezidentlikka yana nomzodini qo‘yishi mumkinligiga shama qilgan. 1-iyulda Rossiya konstitutsiyasiga o‘zgartirishlar kiritish bo‘yicha umummilliy ovoz berish jarayoni muvaffaqiyatli o‘tkazildi.
Izoh (0)