«Левада-центр» сўровномасида қатнашган россияликларнинг 23 фоизи Путинга ишонишини билдирган. Халқнинг ишончи уч йилдан бери пасаймоқда

2020 йил июль ойида «Левада-центр» ўтказган сўровнома иштирокчиларининг 23 фоизи Россия президенти Влaдимир Путинга ишонишини маълум қилди. Бу ҳақда Meduza хабар берган.

Респондентларга 16 та сиёсатчи орасидан ўзлари ишонадиган беш ёки олти нафарининг исмини айтиш сўралган.

«Левада» маълумотлари бўйича 2017 йил ноябрь ойидан бери (сўровнинг ушбу муддатдан аввалги натижалари келтирилмаган) Путиннинг ишонч рейтиниги кескин пасайиб бормоқда, гоҳ-гоҳида бир ёки икки поғонага ўсиш кузатилади. 2017 йил ноябрь ойида сўровномада қатнашган иштирокчиларнинг 59 фоизи Россия президентига ишонишини маълум қилганди.

60 фоиз иштирокчи Путиннинг президент сифатидаги фаолиятини маъқуллаши, 33 фоизи эса сиёсатдан норози эканини билдирган. 2000 йилдан бери Путиннинг «Левада» сўровномасидаги энг юксак ишонч рейтинги 2015 йилда кузатилган ва ўшанда иштирокчиларнинг 87 фоизи Россия президентига ишонишини айтганди.

Сўровнома 24—25 июль кунлари телефон орқали ўтказилган, унда ёши 18 да ёки ундан катта, жами 1617 нафар фуқаро иштирок этган.

2020 йил март ойида Бутунроссия жамоатчилик фикрини ўрганиш маркази Путинга халқнинг ишончи рейтинги 2006 йил январидан бери рекорд даражада паст — 28,3 фоиз эканини билдирган. 2019 йил январь ойида Путинга россияликларнинг 33,4 фоизи ишонишини ойдинлашганди.

Ушбу марказнинг 2019 йил май ойидаги сўровномасида қатнашганларнинг 30 фоизи муқобил жавобларсиз сиёсатчиларга ишонч ҳақидаги саволларга (вариант берилмаган) Путиннинг исм-фамилиясини айтиб жавоб берган. Шундан кейин марказ очиқ саволнинг услубини ўзгартириб, «Владимир Путинга ишонасизми ёки йўқ?» дея савол бериб, сўровнома ўтказишни бошлаганди.

2019 йил 30 июлда «Левада-центр» ўтказилган сўровномада россияликларнинг 38 фоизи Владимир Путиннинг амалдаги ваколати тугаганидан кейин қайта президентликка сайланишига қарши овоз берганди. 2020 йил 21 июнда агар Россия конституциясида бунга шароит яратилса, Путин президентликка яна номзодини қўйиши мумкинлигига шама қилган. 1 июлда Россия конституциясига ўзгартиришлар киритиш бўйича умуммиллий овоз бериш жараёни муваффақиятли ўтказилди.