Tojikiston O‘zbekiston va Afg‘onistonga elektr energiyasi uzatishni to‘xtatmoqda. Bu haqda Tojikiston prezidenti saytida mamlakat hukumati tomonidan e’lon qilingan murojaatda ma’lum qilingan.
“Bugun biz xalqaro shartnomalarda belgilangan muddatdan oldin O‘zbekiston va Afg‘onistonga elektr energiyasini yetkazib berishni to‘xtatishga majbur bo‘ldik. Hukumat cheklov haqidagi ushbu qarorga to‘g‘ri munosabatda bo‘lishni so‘rab, mamlakatning barcha aholisiga murojaat qiladi. Hozirgi qiyin vaziyatda mazkur ish qish mavsumida elektr energiyasi ta’minotidagi muammolardan qochishimizga yordam beradigan yagona chora hisoblanadi”, — deyiladi xabarda.
Tojikiston hukumati yuzaga kelgan vaziyat sabab mamlakatning o‘zida ham energiya ta’minotiga cheklov joriy etayotgani va murojaatda aholidan cheklovni to‘g‘ri qabul qilishni so‘rgan.
Murojaatda mavjud vaziyatni hisobga olgan holda, mulkchilik shaklidan qat’i nazar, har bir fuqaro, har bir oila, barcha muassasa va tashkilotlar, kompaniya hamda korxonalar elektr energiyasidan tejamkor foydalanishni ta’minlashi shartligi aytiladi.
Shuningdek, ushbu holatga Vaxsh va Panj daryolarining shakllanish hududlarida 2019—2020-yil qishida qor kam yoqqani, yog‘ingarchilik miqdori o‘tgan yilgi ko‘rsatkichning 50 foiziga teng bo‘lgani sabab qilib keltirilgan.
“Tojikistonda bunday vaziyat birinchi marta sodir bo‘lyapti. Bugungi kunda Panj daryosida suv oqimi avvalgi yillarga qaraganda 2 ming kub metrga, shuningdek, Vaxsh daryosida 800 kub metrga, ya’ni 50 foizga kam. Norak suv omborida suv zaxirasi o‘tgan yilga nisbatan 17 metrga pasayib ketdi”, — deyiladi murojaatda.
Agar bu holat yana davom etsa, u holda suv omboridagi suv zahirasi keskin kamayadi va qishda aholi va xalq xo‘jaligi tarmoqlarini elektr energiyasi bilan ta’minlashda jiddiy muammolar yuzaga keladi. Shu sababli, hukumat o‘z murojaatida kuz-qish davrida aholi elektr energiyasi ta’minotida muammoga duch kelmasligi uchun barcha zarur choralarni ko‘rayotgani ta’kidlagan.
Kuz-qish mavsumlarida elektr energiyasi ta’minotidagi doimiy uzilishlar haqida hech qanday izoh berilmagan. Shuningdek, 27-iyul kuni kompaniyaning olti oylik faoliyati yakunlariga bag‘ishlangan matbuot anjumanida “Barqi tojik” rahbarlari ham mazkur cheklov joriy etilishi haqida gapirmagan.
Eslatib o‘tamiz, Tojikiston sovuq ob-havo boshlangani va respublikaning ichki ehtiyojlarini ta’minlash maqsadida O‘zbekistonga elektr energiyasi eksport qilishni o‘tgan yilning dekabr oyida to‘xtatgan edi. 2020-yilning may oyida kelib Tojikiston elektr energiyasini yetkazib berishni tiklagani to‘g‘risida xabar berilgan. 21-iyul kunidan boshlab O‘zbekiston bo‘ylab elektr energiyasi iste’molchilariga cheklovlar kiritilgani ma’lum qilingan edi. Shuningdek, respublika bo‘ylab vaqtinchalik elektr ta’minotidagi uzilishlariga Tojikistondan qabul qilinayotgan elektr energiyasi importi hajmining keskin qisqarishi ham sabab bo‘lgani aytilgan.
Izoh (0)