Davlat xizmatlari agentligi axborot xizmati tizimda faoliyat olib boruvchi 57 nafar xodimda koronavirus infeksiyasi aniqlangani, 1 nafar xodim COVID-19 asoratlaridan vafot etgani, 2 kishi kasallikdan tuzalganini ma’lum qildi.
Xabarda O‘zbekistonga koronavirus pandemiyasi kirib kelgach, odamlarning hayot tarzi butkul o‘zgargani, barcha tashkilotlar yangi sharoitda ishlash yo‘lini ishlashga majbur bo‘lgani, davlat xizmatlari markazlari ham bundan mustasno bo‘lmay, qisqa vaqt ichida faoliyatini qayta ko‘rib chiqib, karantin sharoitida ishlashda davom etgani qayd etilgan.
“Davlat xizmatlari markazlarida odamlar oqimi yuqori bo‘lgani bois bu yerda cheksiz va nazorat qilish qiyin bo‘lgan aloqa yuzaga kelishi tabiiy hol”, – deyilgan xabarda.
DXA davlat xizmatlari markazlarida barcha zarur choralar ko‘rilishi, belgilangan grafik asosida binolar dezinfeksiya qilinayotgani, xodimlar zaruriy himoya vositalari bilan ta’minlanayotganini bildirgan. Shuningdek, kirishda har bir tashrif buyuruvchining harorati o‘lchanib, bino ichida majburiy niqob rejimi o‘rnatilganini ma’lum qilgan.
“Agentlik oldida turgan dolzarb masalalardan biri — DXM va FHDYo bo‘limlariga tashrif buyurgan fuqarolar hamda xizmatda bo‘lgan xodimlarimizni mazkur virusdan himoya qilish. Yashash tarzimiz o‘zgargani bilan davlat xizmatlarini olish ehtiyoji hech qayerga daf bo‘lgani yo‘q. Shu bois sizlardan elektron xizmatlardan foydalanishni so‘raymiz. Sizlarga qulay bo‘lishi uchun xizmatlardan onlayn foydalanish videoqo‘llanmalarini tayyorlab, YouTube’ga joylashtiryapmiz”, – deyiladi DXA xabarida.
Eslatib o‘tamiz, 2020-yil 16-iyulda Davlat xizmatlari agentligi Navoiy viloyati boshqarmasining mas’ul xodimi Adhamjon Dehqonov koronavirus asoratlaridan vafot etgan. Biroq SSV ushbu holat yuzasidan hanuzgacha rasmiy izoh bermay kelmoqda.
2020-yil 25-iyulda Davlat xizmatlari agentligining axborot xizmati Surxondaryo viloyati boshqarmasi boshlig‘i Zafarjon Akramov vafot etgani xabar qilingan, biroq uning o‘limiga koronavirus sabab bo‘lmagani aytilgan.
Izoh (0)