Давлат хизматлари агентлиги ахборот хизмати тизимда фаолият олиб борувчи 57 нафар ходимда коронавирус инфекцияси аниқлангани, 1 нафар ходим COVID-19 асоратларидан вафот этгани, 2 киши касалликдан тузалганини маълум қилди.
Хабарда Ўзбекистонга коронавирус пандемияси кириб келгач, одамларнинг ҳаёт тарзи буткул ўзгаргани, барча ташкилотлар янги шароитда ишлаш йўлини ишлашга мажбур бўлгани, давлат хизматлари марказлари ҳам бундан мустасно бўлмай, қисқа вақт ичида фаолиятини қайта кўриб чиқиб, карантин шароитида ишлашда давом этгани қайд этилган.
«Давлат хизматлари марказларида одамлар оқими юқори бўлгани боис бу ерда чексиз ва назорат қилиш қийин бўлган алоқа юзага келиши табиий ҳол», – дейилган хабарда.
ДХА давлат хизматлари марказларида барча зарур чоралар кўрилиши, белгиланган график асосида бинолар дезинфекция қилинаётгани, ходимлар зарурий ҳимоя воситалари билан таъминланаётганини билдирган. Шунингдек, киришда ҳар бир ташриф буюрувчининг ҳарорати ўлчаниб, бино ичида мажбурий ниқоб режими ўрнатилганини маълум қилган.
«Агентлик олдида турган долзарб масалалардан бири — ДХМ ва ФҲДЁ бўлимларига ташриф буюрган фуқаролар ҳамда хизматда бўлган ходимларимизни мазкур вирусдан ҳимоя қилиш. Яшаш тарзимиз ўзгаргани билан давлат хизматларини олиш эҳтиёжи ҳеч қаерга даф бўлгани йўқ. Шу боис сизлардан электрон хизматлардан фойдаланишни сўраймиз. Сизларга қулай бўлиши учун хизматлардан онлайн фойдаланиш видеоқўлланмаларини тайёрлаб, YouTube’га жойлаштиряпмиз», – дейилади ДХА хабарида.
Эслатиб ўтамиз, 2020 йил 16 июлда Давлат хизматлари агентлиги Навоий вилояти бошқармасининг масъул ходими Адҳамжон Деҳқонов коронавирус асоратларидан вафот этган. Бироқ ССВ ушбу ҳолат юзасидан ҳанузгача расмий изоҳ бермай келмоқда.
2020 йил 25 июлда Давлат хизматлари агентлигининг ахборот хизмати Сурхондарё вилояти бошқармаси бошлиғи Зафаржон Акрамов вафот этгани хабар қилинган, бироқ унинг ўлимига коронавирус сабаб бўлмагани айтилган.
Изоҳ (0)