AOKA shtabida tashkil qilingan brifingda Sanitariya epidemiologiya nazorati davlat inspeksiyasi rahbari Nurmat Otabekov internet tarmog‘ida shifokorlarning koronavirusni davolash borasidagi turli yondashuvlariga munosabat bildirdi.
Jumladan, mutaxassis aholidan kelgan “Internet tarmoqlarida tibbiyot xodimlari koronavirus tashxisi, davolash va profilaktikasi bo‘yicha bir-biriga umuman qarama-qarshi fikrlarni yozishyapti. SSV rahbarligida hamma shifokorlar yagona bir to‘xtamga kelib olib, bir xil tavsiyalar bersa bo‘lmaydimi? Ularga quloq solgan aholining ham boshi qotib qolgan, kimga ishonishini bilishmaydi?”, degan savolni atroflicha izohlagan.Bir soha vakillarining har xil fikrda bo‘lishi tabiiy hol, u o‘z yo‘lida bahs-munozaralarga sabab bo‘lib, natijada haqiqat qaror topadi.Men sog‘lom raqobat, sog‘lom bahs-munozara tarafdoriman, uni qo‘llab-quvvatlayman. Biroq o‘zini yaxshi qilib ko‘rsatish uchun boshqani yomon qilib ko‘rsatishga urinayotganlar ham yo‘q emas. Kuzatib boryapman ba’zi tibbiyot xodimlari qaysidir toifadagi bemorlarga nimalarnidir tavsiya etsa, darhol ikkinchi bir shifokor paydo bo‘lib, ushbu tavsiyalarning noto‘g‘ri ekanligini, foyda bermasligini, u ham bu yoqda tursin, hatto zarari borligi haqidagi fikrlarni olg‘a suryapti. Natijada buni eshitib turgan odamlarda noqulayliklar yuzaga kelyapti. Shunday ekan, tibbiyot xodimlaridan bir narsani iltimos qilar edim. Mabodo biror tibbiyot xodimi bilib-bilmasdan biror narsani noto‘g‘ri tavsiya qilgan bo‘lsa, zudlik bilan uni qoralashga urinmasdan, aynan mana shu vaziyatdan tibbiyot xodimini ham, unga ishonib xato qilayotgan insonni ham sezdirmasdan olib chiqib ketish kerak.
Nazarimda tibbiyot xodimlari bir-birini to‘ldirishi, qo‘shimcha tavsiyalar berishi, lozim bo‘lsa ishonuvchan fuqarolarni chalg‘itmaslik uchun bunday hollarga barham berishimiz kerak. Issiq jon, qayerdadir kimdir xato qilgan bo‘lishi mumkin. Lekin pashshadan fil yasamasdan, to‘g‘ri yo‘l ko‘rsatib vaziyatdan olib chiqib ketilsa, ko‘proq samara beradi.
Nurmat Otabekov, Sanitariya epidemiologiya nazorati davlat inspeksiyasi rahbari
Mavzuga doir:
- “Ikki tabletka bilan ham tuzalib ketish mumkin”. Koronavirus yengil kechayotgan bemorlarga ko‘p dori tayinlash o‘rinsiz ekani ta’kidlandi
- O‘zbekistonda “Plakvenil”ni davolash protokollardan chiqarib tashlash haqida gapirgan “Tez yordam” ko‘rsatuvi ekspertiga tahdid qilingani aytildi (video)
- “Tez yordam” ko‘rsatuvi eksperti: Qat’iy karantindan ma’no qolmadi
Izoh (0)