Nurmat Otabekov: “Biz virusning tashqi muhitda o‘lishiga qo‘yib bermayapmiz, qo‘lma-qo‘l uzatyapmiz”

Sanitariya-epidemiologiya nazorati davlat inspeksiyasi bosh inspektori Nurmat Otabekov havoning isishi nega virus ko‘payishiga to‘siq bo‘la olmayotganini izohladi.

“Koronavirus — insoniyat uchun yangi kasallik. U o‘zining ko‘p qirralarini namoyon qilyapti. Shuning uchun ham Jahon sog‘liqni saqlash tashkiloti bir to‘xtamga kela olmayapti. Tashxis, davolash, profilaktika nuqtayi nazaridan ham. Ammo biz tibbiyot xodimlari bilamizki, havo issiq va quruq bo‘lsa, virus o‘ladi. Koronavirus qo‘zg‘atuvchisi ham bu havo va sharoitda o‘ladi. Biz kasallik virusining tashqi muhitda o‘lishiga qo‘yib bermayapmiz. Biz uni qo‘lma-qo‘l qilib, bir-birimizga uzatyapmiz. Karantin va cheklov tadbirlarini esdan chiqarib, o‘zimiz va oilamizni xavf ostiga qo‘yyapmiz. Asosan, kasallik virusi bino va inshootlarda yuqyapti. Bu yerda kasallik avj olib ketishiga ob-havoni ham, virusni ham sababchi qilib ko‘rsatish kerak emas. Sababni o‘zimizdan qidirishimiz kerak”.

Shuningdek, mutaxassis karantin tadbirlarining cho‘zilishiga aholi tomonidan karantin yumshatilishiga nisbatan uning tugagani kabi munosabatda bo‘lganini muhim omil sifatida keltirib o‘tdi.

Eslatib o‘tamiz, avvalroq Koronavirusga qarshi kurash shtabi a’zosi Habibullo Oqilov ham koronavirus 30 daraja issiq va undan yuqori haroratda yuqish faolligini to‘liq yo‘qotishi, havo namligining pasayishi va to‘g‘ridan to‘g‘ri tushuvchi quyosh nurlari virusni nobud qilishi, havo harorati 70 daraja va undan yuqori bo‘lganda esa virus to‘liq yo‘qolishini aytgan edi.