Ijtimoiy tarmoqlarda Toshkent shahar Olmazor tumani ichki ishlar organlari faoliyatini muvofiqlashtirish boshqarmasida bo‘lib o‘tgan majlisdan yozib olingani taxmin qilingan ovozli xabar tarqalgani va ovozning Olmazor tumani IIO FMB Huquqbuzarliklar profilaktikasi boshqarmasi maxsus topshiriqlar bo‘yicha inspektori podpolkovnik Farrux Xolovga tegishli ekani haqida xabar berilgandi.
Farrux Xolov har bir profilaktika inspektori turli moddalar bo‘yicha kuniga 5 tadan ma’muriy bayonnoma tuzishi haqida topshiriq bergan. Shuningdek, u mazkur ovoz o‘ziniki ekanligini tasdiqlagan. Toshkent shahar Ichki ishlar bosh boshqarmasi mazkur audioyozuv bo‘yicha o‘z izohini berdi.
Toshkent shahar IIBB ham mazkur ovoz Farrux Xolovga tegishli ekanligini tasdiqlagan va shaxsiy tarkibga vazifalarning noto‘g‘ri yetkazilishi munosabati bilan rahbar bo‘lmagan va shaxsiy tarkib oldiga vazifa qo‘yish vakolatiga ega bo‘lmagan Olmazor tumani IIO FMB xodimiga nisbatan xizmat tekshiruvi belgilanganini ma’lum qilgan.
“Profilaktika inspektori oldida huquqbuzarliklarni aniqlash va oldini olish, qoidabuzarlarga nisbatan qonuniy chora ko‘rish vazifasi turadi. Ya’ni mayda bezorilik, maishiy janjallar kabi huquqbuzarliklarning oldini olishga qaratilgan aholi orasidagi profilaktik ishlar muntazam ravishda olib borilishi zarur, shuningdek, kuchli ta’sir qiluvchi va psixotrop preparatlar, giyohvandlik moddalarining noqonuniy savdosi bilan bog‘liq jinoyatlarga qarshi o‘z vaqtida chora ko‘rish zarur. Bu kabi huquqbuzarlik va jinoyatlar aniqlangan taqdirda profilaktika inspektori qonuniy chora ko‘rishi, qonunbuzarlik faktini yashirmasdan, holatni qonuniy rasmiylashtirishi zarur”, — deyiladi IIBB munosabatida.
Qayd etilishicha, “natija” so‘zidan maqsad profilaktika inspektorlarining ish sifati hisoblanadi. “Buning ko‘rsatkichi esa aholi huquqiy savodxonligining oshishi, jinoyat va huquqbuzarliklar sonining pasayishida ifoda topib, ko‘rilgan choralarning samarasidan darak beradi”, — deya ta’kidlagan Toshkent shahar IIBB.
Munosabatda qayd etilishicha, “reja” so‘zini rasmiylashtirilgan bayonnomalar soni deb tushunish noto‘g‘ri. “Har qanday faoliyatda ish rejasi zarur bo‘ladi. Profilaktika inspektorlarining ish rejasi deganda, aholi bilan — fuqarolarning alohida toifasi bilan ishlash rejasi nazarda tutilib, mazkur reja ishonib topshirilgan mahalla hududidagi kriminogen holatdan kelib chiqqan holda muvofiqlashtiriladi”, — deya izoh berilgan.
Eslatib o‘tamiz, ichki ishlar vaziri maslahatchisi, general-polkovnik Zokirjon Almatov iyun oyida “Kun.uz”ga bergan intervyusida yo‘l-patrul xizmati inspektorlari misolida ichki ishlar organlari xodimlaridan “Bugun nechta protokol qilding?” deb so‘rash odatiga chek qo‘yilganini aytgandi.
Izoh (0)