АОКА штабида ташкил қилинган брифингда Санитария эпидемиология назорати давлат инспекцияси раҳбари Нурмат Отабеков интернет тармоғида шифокорларнинг коронавирусни даволаш борасидаги турли ёндашувларига муносабат билдирди.
Жумладан, мутахассис аҳолидан келган «Интернет тармоқларида тиббиёт ходимлари коронавирус ташхиси, даволаш ва профилактикаси бўйича бир-бирига умуман қарама-қарши фикрларни ёзишяпти. ССВ раҳбарлигида ҳамма шифокорлар ягона бир тўхтамга келиб олиб, бир хил тавсиялар берса бўлмайдими? Уларга қулоқ солган аҳолининг ҳам боши қотиб қолган, кимга ишонишини билишмайди?», деган саволни атрофлича изоҳлаган.Бир соҳа вакилларининг ҳар хил фикрда бўлиши табиий ҳол, у ўз йўлида баҳс-мунозараларга сабаб бўлиб, натижада ҳақиқат қарор топади.Мен соғлом рақобат, соғлом баҳс-мунозара тарафдориман, уни қўллаб-қувватлайман. Бироқ ўзини яхши қилиб кўрсатиш учун бошқани ёмон қилиб кўрсатишга уринаётганлар ҳам йўқ эмас. Кузатиб боряпман баъзи тиббиёт ходимлари қайсидир тоифадаги беморларга нималарнидир тавсия этса, дарҳол иккинчи бир шифокор пайдо бўлиб, ушбу тавсияларнинг нотўғри эканлигини, фойда бермаслигини, у ҳам бу ёқда турсин, ҳатто зарари борлиги ҳақидаги фикрларни олға суряпти. Натижада буни эшитиб турган одамларда ноқулайликлар юзага келяпти. Шундай экан, тиббиёт ходимларидан бир нарсани илтимос қилар эдим. Мабодо бирор тиббиёт ходими билиб-билмасдан бирор нарсани нотўғри тавсия қилган бўлса, зудлик билан уни қоралашга уринмасдан, айнан мана шу вазиятдан тиббиёт ходимини ҳам, унга ишониб хато қилаётган инсонни ҳам сездирмасдан олиб чиқиб кетиш керак.
Назаримда тиббиёт ходимлари бир-бирини тўлдириши, қўшимча тавсиялар бериши, лозим бўлса ишонувчан фуқароларни чалғитмаслик учун бундай ҳолларга барҳам беришимиз керак. Иссиқ жон, қаердадир кимдир хато қилган бўлиши мумкин. Лекин пашшадан фил ясамасдан, тўғри йўл кўрсатиб вазиятдан олиб чиқиб кетилса, кўпроқ самара беради.
Нурмат Отабеков, Санитария эпидемиология назорати давлат инспекцияси раҳбари
Мавзуга доир:
- «Икки таблетка билан ҳам тузалиб кетиш мумкин». Коронавирус енгил кечаётган беморларга кўп дори тайинлаш ўринсиз экани таъкидланди
- Ўзбекистонда «Плаквенил»ни даволаш протоколлардан чиқариб ташлаш ҳақида гапирган «Тез ёрдам» кўрсатуви экспертига таҳдид қилингани айтилди (видео)
- «Тез ёрдам» кўрсатуви эксперти: Қатъий карантиндан маъно қолмади
Изоҳ (0)