Oltin narxi 27-iyul kuni savdolar davomida 2011-yilda qayd etilgan rekordni yangiladi va bir unsiya narxi 1934 dollarga chiqdi. Bundan avvalgi kunlik rekord 2011-yil 6-sentabrda qayd etilgan bo‘lib, o‘shanda oltinning bir unsiyasi 1923,7 dollarga yetgandi, deb yozmoqda Spot.
Wall Street Journal’ning yozishicha, koronavirus dunyoda oltinga bo‘lgan talabning oshishiga olib kelgan. Qayd etilishicha, oltinni nafaqat treyderlar, balki jismoniy shaxslar ham sotib olmoqda.
Bloomberg’ning yozishicha, investorlar oltinni xavfsiz aktiv sifatida ko‘rmoqda va pandemiya fonida unga pul tikmoqda.
Oltinga bo‘lgan talabning oshishiga yana bir sabab sifatida AQSh va Xitoy o‘rtasidagi taranglik ko‘rsatilmoqda.
Oltin narxi oshishining O‘zbekistonga ta’siri
O‘zbekiston 2020-yilning olti oyi davomida 234,6 million dollarlik gaz eksport qilgan, bu o‘tgan yilning mos davriga nisbatan 76 foizga kamroq. Neft yetkazib berish 60 foizga, rangli metallar eksport esa 30 foizga kamaygan.
Oltin eksporti O‘zbekistoning eksport hajmida 33,8 foizni tashkil qiladi. O‘tgan ikki yilda esa oltinning eksport tarkibidagi ulushi 26 foizdan oshmagan. 2020-yil boshidan buyon O‘zbekiston 2,1 milliard dollar qiymatidagi oltinni eksport qilgan.
O‘zbekiston Markaziy banki may oyining boshida 2020-yil uchun o‘z prognozlarini e’lon qilgan va unda aks etgan kam sonli ijobiy prognozlardan biri aynan oltin bo‘lgan. Markaziy bank prognoziga ko‘ra, oltin narxining oshishi davlat budjeti daromadlariga ijobiy ta’sir ko‘rsatadi.
Avvalroq oltin narxi 1,4 foizga, ya’ni bir unsiya uchun 1803 AQSh dollariga qimmatlashib, 2011-yildan buyon eng yuqori ko‘rsatkichga yetgani xabar berilgandi. Bunga koronavirus pandemiyasining ikkinchi to‘lqini xavfi, AQSh va Xitoy o‘rtasidagi ziddiyatlar, shuningdek, rivojlangan davlatlar iqtisodiyotiga keng ko‘lamli mablag‘lar jalb qilinishi sabab bo‘lgandi.
Izoh (0)