Kiyevning “Dinamo” klubi bosh murabbiyi Mircha Luchesku jamoani tark etdi. Bu haqda Sporturilor nashri xabar qilmoqda.
Avvalroq “Dinamo” bilan shartnoma imzolagan ruminiyalik mutaxassis to‘rt kun o‘tib iste’fo berishini ma’lum qildi. Luchesku bunga “Dinamo” muxlislarining dushmanlarga xos munosabati sabab bo‘lganini ta’kidlagan.
“Taklif uchun “Dinamo” rahbarlariga rahmat aytaman, biroq bunday dushmanchilik ruhidagi atmosferada ishlash mumkin emas. Ayniqsa jamoani har doim qo‘llab-quvvatlashi kerak bo‘lgan “ultras” (ashaddiy muxlislar guruhi) mana shunday kayfiyatda bo‘lib turganda.
Men hech qachon qo‘rqmaganman va har doim chorlovlarni qabul qilganman. Buning isboti tariqasida “Galatasaroy”dan “Beshiktosh”ga o‘tish yoki Buxarestning “Dinamo” va “Rapid” jamoalaridagi ishimni ko‘rsata olaman.
Gap pulda emas, bu men uchun so‘nggi o‘rindagi jihat edi. Shunchaki o‘zim yoqtirgan Ukraina futboliga qaytgim va futbolning maftunkor tarovatini yana bir bor his qilgim kelgandi”, — deydi mutaxassis.
Ma’lumot uchun, Luchesku 2004—2016-yillar mobaynida “Dinamo”ning azaliy raqibi “Shaxtyor”ni boshqargan. Mazkur tayinlov ko‘plab kiyevlik muxlislar noroziligiga sabab bo‘lgandi.
74 yoshli mutaxassis o‘z vaqtida “Breshiya”, “Inter”, “Galatasaroy”, “Beshiktosh” va “Zenit” kabi nomdor klublarda ishlagan. Shuningdek, Mircha Ruminiya va Turkiya terma jamoalarini ham boshqargan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)