«Динамо Киев» бош мураббийи этиб тайинланганига 4 кун бўлган Мирча Луческу истеъфо берди

Киевнинг «Динамо» клуби бош мураббийи Мирча Луческу жамоани тарк этди. Бу ҳақда Sporturilor нашри хабар қилмоқда.

Аввалроқ «Динамо» билан шартнома имзолаган руминиялик мутахассис тўрт кун ўтиб истеъфо беришини маълум қилди. Луческу бунга «Динамо» мухлисларининг душманларга хос муносабати сабаб бўлганини таъкидлаган.

«Таклиф учун «Динамо» раҳбарларига раҳмат айтаман, бироқ бундай душманчилик руҳидаги атмосферада ишлаш мумкин эмас. Айниқса жамоани ҳар доим қўллаб-қувватлаши керак бўлган «ултрас» (ашаддий мухлислар гуруҳи) мана шундай кайфиятда бўлиб турганда.

Мен ҳеч қачон қўрқмаганман ва ҳар доим чорловларни қабул қилганман. Бунинг исботи тариқасида «Галатасарой»дан «Бешиктош»га ўтиш ёки Бухарестнинг «Динамо» ва «Рапид» жамоаларидаги ишимни кўрсата оламан.

Гап пулда эмас, бу мен учун сўнгги ўриндаги жиҳат эди. Шунчаки ўзим ёқтирган Украина футболига қайтгим ва футболнинг мафтункор тароватини яна бир бор ҳис қилгим келганди», — дейди мутахассис.

Маълумот учун, Луческу 2004—2016 йиллар мобайнида «Динамо»нинг азалий рақиби «Шахтёр»ни бошқарган. Мазкур тайинлов кўплаб киевлик мухлислар норозилигига сабаб бўлганди.

74 ёшли мутахассис ўз вақтида «Брешия», «Интер», «Галатасарой», «Бешиктош» ва «Зенит» каби номдор клубларда ишлаган. Шунингдек, Мирча Руминия ва Туркия терма жамоаларини ҳам бошқарган.