O‘zbekiston elchisi Sardor Rustamboyev 20-iyul kuni Lissabonda Portugaliya prezidenti Marselo Rebelo de Souzaga ishonch yorlig‘ini topshirdi. Bu haqda “Dunyo” agentligi xabar berdi.
Rasmiy marosimdan so‘ng bo‘lib o‘tgan suhbatda Portugaliya prezidenti O‘zbekistonda Shavkat Mirziyoyev rahnamoligida jadal va izchil amalga oshirilayotgan keng ko‘lamli o‘zgarishlarni qo‘llab-quvvatlashini ta’kidlagan.
Marselo Rebelo de Souza O‘zbekiston Prezidenti bilan 2019-yil aprel oyida Pekin shahrida “Bir makon — bir yo‘l” sammiti doirasida bo‘lib o‘tgan samimiy uchrashuvni eslab, Shavkat Mirziyoyevga chuqur hurmatini hamda ezgu tilaklarini izhor etgan.
“Portugaliya rahbari hamkorlik kun tartibidagi masalalar, mintaqaviy va xalqaro tuzilmalar doirasidagi munosabatlarning keng qamrovli jihatlari yuzasidan fikr almashar ekan, o‘zaro manfaatli sheriklik aloqalarini yanada mustahkamlash tarafdori ekanini bildirdi”, — deyiladi xabarda.
Eslatib o‘tamiz, Sardor Rustamboyev O‘zbekistonning Fransiyadagi favqulodda va muxtor elchisi hisoblanadi. 2018-yil sentabr oyida Fransiya prezidenti Emmanuel Makronga ishonch yorlig‘i topshirilgan edi.
Ma’lumot uchun, Sardor Rustamboyev bir vaqtning o‘zida O‘zbekistonning Portugaliyadagi elchisi vazifasini ham bajaradi.
Avvalroq O‘zbekistonning yangi elchisi videokonferensaloqa orqali suhbatda Hindiston prezidentiga ishonch yorliqlarini topshirgan edi.
Izoh (0)