Сурхондарё, Жиззах ва Тошкент вилоятларида турли жиноятларни содир этганлиги учун қидирувга берилган шахслар Тошкент шаҳрида қўлга олинди. Бу ҳақда Ички ишлар вазирлиги матбуот хизмати хабар берди.
Хусусан, Жиноят кодексининг 169-моддасида (Ўғрилик) назарда тутилган жиноятни содир этганлиги учун қидирув эълон қилинган жиззахлик 27 ёшли Дилшод А. 15 июль куни Миробод тумани ИИО ФМБ ходимлари томонидан Қўйлиқ бозори ҳудудида қўлга олинди.
Яккасарой тумани ИИО ФМБ ходимлари 17 июль куни Жиноят кодексининг 168-моддасида (Фирибгарлик) назарда тутилган жиноятни содир этганлиги учун қидирувга берилган, Тошкент вилоятида яшовчи 30 ёшли Бекзод М.ни Бектемир тумани ҳудудида қўлга олган.
19 июль куни Мирзо Улуғбек тумани ИИО ФМБ ходимлари Жиноят кодексининг 169-моддасида (Ўғрилик) кўрсатилган жиноятни содир этганликда айбланиб, қидирув эълон қилинган, Тошкент вилоятидан бўлган 21 ёшли Андрей О.ни мазкур туман ҳудудида қўлга олди.
Шунингдек, Термиз шаҳрида 2015 йилнинг 15 июль куни Жиноят кодексининг 278-моддаси 2-қисмида (Қимор ва таваккалчиликка асосланган бошқа ўйинларни ташкил этиш ҳамда ўтказиш) кўрсатилган жиноятни содир этиб, жиноий жавобгарликдан қочиб юрган термизлик К.А. 2020 йилнинг 20 июль куни Тошкент шаҳрида хизмат сафарида бўлган вилоят Ички ишлар бошқармаси ходимлари томонидан Яккасарой тумани ҳудудида қўлга олинган.
Бундан ташқари, 18 июль куни Миробод тумани жиноят-қидирув бўлими ва ППХ ходимлари Жиноят кодексининг 248-моддасида (Қурол, ўқ-дорилар, портловчи моддалар ёки портлатиш қурилмаларига қонунга хилоф равишда эгалик қилиш) кўрсатилган жиноятни содир этганликда айбланиб, қидирувга берилган 38 ёшли Николай Я.ни Қўйлиқ бозори ҳудудида қўлга олди.
Изоҳ (0)