“O‘zbekistonda koronavirusga chalinganlarni davolash bilan shug‘ullanadigan shifokorlar tanqisligining oldi olinmoqda” — Nurmat Otabekov

Respublikada koronavirusga chalingan bemorlarni davolash jarayonida tibbiyot xodimlariga nisbatan ehtiyoj tug‘ilmasligi uchun hukumat barcha imkoniyatlarni ishga solgan. Bu haqda 16-iyul, payshanba kuni AOKAda bo‘lib o‘tgan brifingda davlat bosh sanitariya inspektori Nurmat Otabekov ta’kidlab o‘tdi, deya xabar bermoqda “Daryo” muxbiri.

“O‘zbekistonda koronavirus kasalligini davolash bilan shug‘ullanadigan infeksionistlar, pediatrlar, reanimatologlar, pulmonologlar, bemorlarga tashxis qo‘yuvchi rentgenologlarga doim ehtiyoj bor. Bitta narsani unutmasligimiz kerak, bu kabi ehtiyojlar bo‘lmasligi uchun hamma imkoniyatlar ishga solingan.

Tibbiyot xodimlari brigadasi bir smena ishlab, ya’ni 14 kun ishlab, ikkinchi 14 kunlik davomida nazoratda bo‘lgan vaqtda o‘rniga boshqa shifokorlarni qo‘yishda muammo bo‘lishi mumkin.

Lekin hozir O‘zbekistonda bu kabi tanqislik umuman yo‘q. Nafaqat mavjud mutaxassislar, balki qisqa o‘quv kurslaridan o‘tkazib qaytadan tayyorlangan mutaxassislar hisobiga bu kabi tanqislikning oldi olinmoqda va bu har doim e’tibor markazidagi masala. Vazirlik, tegishli idoralar buni o‘z nazoratiga olgan. Shu bois ayni paytda respublikada tibbiyot xodimlari yetishmayotgani uchun faoliyatini to‘xtatgan biror-bir shifoxona mavjud emas”, — dedi Sanitariya-epidemiologiya nazorati davlat inspeksiyasi boshlig‘i Nurmat Otabekov.