O‘zbekistonda koronavirus tufayli qayd etilayotgan o‘lim holatlarining aksariyati pnevmoniya, nafas olish tizimidagi muammolar bilan bog‘liq. Bu haqda 16-iyul, payshanba kuni AOKAda tashkil etilgan brifingda Sanitariya-epidemiologiya nazorati davlat inspeksiyasi bosh inspektori Nurmat Otabekov ma’lum qildi, deya xabar bermoqda “Daryo” muxbiri.

“Pnevmoniya kasalligi — bu o‘pkaning yallig‘lanishi hisoblanib, uning etiologik omillari, ya’ni yuzaga kelish sabablari turli xil bo‘ladi. Bakteriyalar, viruslar, zamburug‘lar va biror-bir toksik moddalar pnevmoniyani keltirib chiqarishi mumkin.

Lekin bitta narsani aniq bilamiz: koronavirus kasalligining aksariyat hollarda uchrayotgan eng jiddiy asoratlaridan biri — bu o‘pka yallig‘lanishi, ya’ni pnevmoniya. Bu nafaqat o‘choqli pnevmoniya, balki o‘pkada jiddiy muammolarning yuzaga kelishi barobarida, O‘zbekistonda qayd etilayotgan koronavirusdan o‘lim holatlarining aksariyati aynan ushbu asorat, ya’ni nafas olish tizimidagi muammolar bilan bog‘liq.

Pnevmoniya aynan koronavirus bilan chaqirilganmi yoki boshqa bir etiologik omil bilan chaqirilganmi, bundan qat’i nazar unga jiddiy munosabatda bo‘lish kerak. Qachonki nafas tizimi izdan chiqar ekan, organizmda to‘qimalarni kislorod bilan to‘yintirish, to‘qimalardagi karbonat angidridni, zaharli moddalarni organizmdan chiqarib yuborish uchun o‘pka faoliyati o‘ta zarur hisoblanadi”, — dedi Otabekov.

Nurmat Otabekovning aytishicha, koronavirus oqibatida vafot etgan o‘zbekistonliklarning ko‘pchiligida ortiqcha vazn bo‘lgan.

“Koronavirusdan vafot etganlarning aksariyatida ortiqcha vazn, surunkali kasalliklar borligi rost. Bilamizki, ortiqcha vazn nafaqat koronavirus kasalligida, balki, boshqa ko‘plab yuqumli kasalliklarga chalinganda ham qo‘shimcha muammolarni keltirib chiqaradi.

Chunki ortiqcha vaznga ega bemorlarda har qanday yuqumli kasalliklarning kechishi og‘ir bo‘ladi, vaznning me’yoridan ko‘pligi davolash jarayoniga salbiy ta’sir ko‘rsatishi mumkin. Lekin aynan ortiqcha vaznga egalik o‘limga sabab bo‘ldi, degan fikrdan yiroqmiz”, — dedi Davlat bosh sanitariya inspektori.