O‘zbekistonda koronavirusga chalinganlar bilan 5 metr radiusda bo‘lgan kishilarni ogohlantiruvchi Self-Safety nomli mobil dastur yaratildi. Bu haqda Sog‘liqni saqlash vazirligi xabar berdi.
Ma’lum qilinishicha, dastur Sog‘liqni saqlash vazirligi, Axborot texnologiyalar va kommunikatsiyalarni rivojlantirish vazirligi hamda Toshkent shahar hokimligi bilan hamkorlikda yaratilgan.
Vazirlik tomonidan ta’kidlanishicha, COVID-19 pandemiyasiga qarshi kurashda mobil dasturlardan foydalanish samaradorligi Janubiy Koreya, Singapur, Isroil, Italiya, Fransiya kabi ko‘plab boshqa davlatlar tajribasida isbotlandi. Bu turdagi dasturlar jamoat joylarida odamlarning kasallik yuqtirib olish ehtimoli paydo bo‘lganda, bu haqda ogohlantiradi.
Dastur mobil telefonning GPS va Bluetooth modullari yordamida foydalanuvchilardan birida kasallik aniqlansa, bir daqiqa ichida barcha foydalanuvchilarning 5 metr radiusda kesishgan nuqtalarini solishtiradi. Kesishuv nuqtalari aniqlangach, dastur mazkur joylarda 5 metrli radiusda bo‘lgan barcha foydalanuvchilarga PUSH-xabarnoma ko‘rinishida kasal bilan aloqada bo‘lganlik ehtimoli to‘g‘risida xabar yuboradi va keyingi xatti-harakatlar bo‘yicha tavsiyalar beradi.
Mobil ilova Android va iOS platformalarida mavjud bo‘lib, uni onlayn do‘konlar va “www.coronavirus.uz” veb-saytidagi havolalar orqali yuklab olish mumkin. Dasturda ro‘yxatdan o‘tishda mobil telefondagi GPS va Bluetooth modullarini yoqib qo‘yish kerak.
Ta’kidlanishicha, dastur undan qancha ko‘p odam foydalansa, uydan tashqarida ushbu dastur faollashtirilsa, shuncha sifatli va yaxshi ishlaydi.
Avvalroq O‘zbekistonda koronavirusning alomatsiz shaklini uyda davolash bo‘yicha savollarga javob beradigan Call-markaz ishga tushgandi.
Izoh (0)