Toshkentning 11 ta tumanida aholi zich yashaydigan hamda dehqon bozorlaridan uzoqda joylashgan 50 ta mahallasida fermerlarga mulk qilib beriladigan “yashil bozor” dala do‘konlarini tashkil etish choralari ko‘rilmoqda. Bu haqda Bosh prokuratura huzurida Iqtisodiy jinoyatlarga qarshi kurash departamenti bo‘lim boshlig‘i Farhod Ochilov ma’lum qildi.
Natijada ayni mahallalardagi 243 mingdan ortiq fuqaro mahsulotlarni “daladan dasturxonga” tamoyili asosida sotib olish imkoniga ega bo‘ladi.“Daladan dasturxonga” tamoyilini tatbiq etish maqsadida “yashil bozor” dala do‘konlarini Buxoro, Jizzax, Navoiy, Samarqand, Surxondaryo va Qashqadaryo viloyatlarining markazlarida ham barpo etish bo‘yicha chora-tadbirlar ko‘rilayotgani aytildi.
Ochilov dehqon o‘z mahsulotini o‘rtakashlarsiz iste’molchiga yetkazishiga asoslangan tamoyilni joriy etishda 2 ta jiddiy muammoga duch kelinganini alohida ta’kidladi. Birinchisi, dehqonlar ongida “dehqon–bu faqatgina mahsulot yetishtiruvchi va o‘rtakashga sotuvchi bo‘g‘in”, degan stereotip o‘rnashib qolganligi, ikkinchisi, dehqonlar byurokratik va jinoiy elementlar sabab bozorga kira olmaganligida, ularda tadbirkorlik o‘zagining shakllanmaganligi. Muammolarni zudlik bilan bartaraf qilish maqsadida o‘rtakashlar bo‘g‘inini istisno qilish talab etilgan.
Endilikda departament tomonidan ulgurji bozorlarda olibsotarlar qo‘lida sarson bo‘layotgan dehqonlarga istagan bozorida, to‘g‘ridan to‘g‘ri, yuk mashinasidan mahsulotini sotishiga sharoit yaratib berilgani bildirildi. Avval dehqon yetishtirgan mahsulotini o‘rtakashga 800 so‘mga sotib, bu mahsulot ustama bilan iste’molchiga 2 000 so‘mga yetib borgan bo‘lsa, endi dehqon uni 1 200 so‘mdan sotib, o‘zi ham daromad qiladi, aholi ham arzon narxda sotib olmoqda.Mexanizm doirasida Toshkent shahridagi 13 ta dehqon bozorida dehqonlarga 70 ta muzlatkich, 615 ta savdo rastasi, 700 dan ortiq tarozi va boshqa vositalar beg‘araz ajratib berilishi ta’minlangan.
Izoh (0)