Ўзбекистонда коронавирусга чалинганлар билан 5 метр радиусда бўлган кишиларни огоҳлантирувчи Self-Safety номли мобил дастур яратилди. Бу ҳақда Соғлиқни сақлаш вазирлиги хабар берди.
Маълум қилинишича, дастур Соғлиқни сақлаш вазирлиги, Ахборот технологиялар ва коммуникацияларни ривожлантириш вазирлиги ҳамда Тошкент шаҳар ҳокимлиги билан ҳамкорликда яратилган.
Вазирлик томонидан таъкидланишича, COVID-19 пандемиясига қарши курашда мобил дастурлардан фойдаланиш самарадорлиги Жанубий Корея, Сингапур, Исроил, Италия, Франция каби кўплаб бошқа давлатлар тажрибасида исботланди. Бу турдаги дастурлар жамоат жойларида одамларнинг касаллик юқтириб олиш эҳтимоли пайдо бўлганда, бу ҳақда огоҳлантиради.
Дастур мобил телефоннинг GPS ва Bluetooth модуллари ёрдамида фойдаланувчилардан бирида касаллик аниқланса, бир дақиқа ичида барча фойдаланувчиларнинг 5 метр радиусда кесишган нуқталарини солиштиради. Кесишув нуқталари аниқлангач, дастур мазкур жойларда 5 метрли радиусда бўлган барча фойдаланувчиларга PUSH-хабарнома кўринишида касал билан алоқада бўлганлик эҳтимоли тўғрисида хабар юборади ва кейинги хатти-ҳаракатлар бўйича тавсиялар беради.
Мобил илова Android ва iOS платформаларида мавжуд бўлиб, уни онлайн дўконлар ва «www.coronavirus.uz» веб-сайтидаги ҳаволалар орқали юклаб олиш мумкин. Дастурда рўйхатдан ўтишда мобил телефондаги GPS ва Bluetooth модулларини ёқиб қўйиш керак.
Таъкидланишича, дастур ундан қанча кўп одам фойдаланса, уйдан ташқарида ушбу дастур фаоллаштирилса, шунча сифатли ва яхши ишлайди.
Аввалроқ Ўзбекистонда коронавируснинг аломатсиз шаклини уйда даволаш бўйича саволларга жавоб берадиган Call-марказ ишга тушганди.
Изоҳ (0)