Maktabgacha ta’lim vazirligi Andijon viloyati, Baliqchi tumanidagi 11-sonli maktabgacha ta’lim tashkilotining sobiq rahbari G.Xo‘jaqulovaning o‘z joniga qasd qilishi voqeasi yuzasidan rasmiy munosabatini e’lon qildi. 1967-yil tug‘ilgan G.Xo‘jaqulova 4-may kuni uyida o‘zini osgan, ayol kasalxonaga yotqizilgan, ammo shifokorlarning qilgan barcha harakatlariga qaramay, 17-may kuni vafot etgandi.
Vazirlik tomonidan tuzilgan ishchi guruh o‘lim holati sabablarini hamda ushbu Maktabgacha ta’lim boshqarmasi faoliyatini o‘rganib chiqqan. O‘rganish natijalariga ko‘ra, bog‘chada qurilish-ta’mirlash ishlari vaqtida budjet mablag‘lari o‘zlashtirilgani aniqlangan, tuman mudiri ishdan olingan.
Baliqchi tumani prokuraturasi tomonidan o‘tkazilgan tergovga qadar tekshiruvga ko‘ra, marhuma sog‘lig‘i hamda ishi bilan bog‘liq muammolar tufayli ruhiy holatidagi o‘zgarishlar natijasida o‘z joniga qasd qilgani aniqlangan. Tuman prokuraturasi tomonidan tayinlangan sud psixiatrik-psixologik ekspertizasi xulosasida ko‘rsatilishicha, bu salbiy holatga ichki qalbiy ziddiyatlar natijasidagi hissiy hayajon turtki bo‘lgan, uning natijasida yuzaga kelgan hissiy beqarorlik joniga qasd qilish holatiga turtki bo‘lgan bo‘lishi mumkinligi ko‘rsatib o‘tilgan.
Ekspertiza xulosasi asosida tuman prokuraturasi tomonidan ushbu holat bo‘yicha tegishli qaror qabul qilingan.
Maktabgacha ta’lim vazirligi ishchi guruhi tomonidan olib borilgan tekshiruv xulosasiga ko‘ra, Baliqchi tumani MTB rahbari S.Xonkeldiyevaning o‘z xizmat vazifasiga mas’uliyat bilan yondashmaganligi natijasida MTBda nosog‘lom muhit yuzaga kelgan.
Shuningdek, tekshiruv davomida Baliqchi tumanidagi 11-sonli davlat MTTda qurilish-ta’mirlash ishlarini olib borgan “Milano qurilish” MChJ rahbari N.Rasulov tomonidan rasmiy hujjatlarga soxta ma’lumotlar kiritilib, qalbaki hujjatlardan foydalanish orqali budjet mablag‘lari o‘zlashtirilgani, qurilish-ta’mirlash ishlarining o‘zi sifatsiz bajarilgani aniqlangan.
Ushbu holat yuzasidan tuman prokuraturasi tomonidan jinoiy ish qo‘zg‘atilgan.
Shuningdek, ishchi guruh Baliqchi tumani MTBda ishlar tizimli yo‘lga qo‘yilmagani, rahbar xizmat vazifalarini lozim darajada bajarmagani, idoraviy nazorat susaytirib yuborilgani va natijada aholi orasida maktabgacha ta’lim tizimiga nisbatan norozilik kayfiyati paydo bo‘lganini aniqlagan.
Yuqoridagilardan kelib chiqqan holda Andijon viloyati, Baliqchi tumani MTB mudiri S.Xonkeldiyeva 26-iyun kuni ishdan olingan.
Izoh (0)