“Agrobank”ning Mirishkor tuman filiali xodimlari hamda bank mijozlari, shuningdek, Milliy gvardiya xodimlari ham bank binosida karantinga olingan. Bu haqda xabar bergan manbaning yozishicha, bankka koronavirusga chalingan bemor kelib-ketgan.
Xabar berilishicha, Mirishkor tuman Sanitariya-epidemiologik osoyishtalik markazi xodimlari bank binosida karantinga olinganlardan COVID-19 uchun test olgan.
Ta’kidlanishicha, ayni kunda bank binosida karantinga olinganlarning sog‘lig‘i yaxshi va doimiy kuzatuvda.
“Daryo” muxbirining aniqlashtirishicha, bank binosi 10-iyul, juma kuni karantinga yopilgan bo‘lib, ichkarida 19 nafar bank xodimi, 3 nafar fuqaro, 2 nafar inkassator va 4 nafar Milliy gvardiya xodimi bor. Bank yopilishi ortidan 11-iyul, shanba kuni tuman markaziga kirib-chiqish ham to‘xtatilgan.
Tuman markaziga kirib-chiqish to‘xtatilganini tasdiqlagan tuman hokimligi axborot xizmati rahbari Azizbek Yazdurdiyev cheklov karantin sababli ekanligini aytdi.
Ma’lumot berilishicha, ayni kunda tumanda besh nafar fuqaro koronavirus yuqtirganlikda gumonlanmoqda. Gumondorlarning 28 nafar oila-a’zosi ham karantinga olingan.
“Mirishkor tumanida yashovchi fuqaroda G‘uzor tumanidagi Uzbekistan GTL zavodida ishlayotgan vaqtida koronavirus aniqlangan bo‘lib, bemor hozirgi vaqtda G‘uzorda davolanmoqda”, — deb yozadi “Pomuq24”.
Eslatib o‘tamiz, Qashqadaryo viloyati maxsus komissiyasi 2020-yilning 3-iyul kuni viloyatdagi vaziyatni oshkor qilgandi. Shundan so‘ng viloyatning G‘uzor tumani va 17 ta mahallasi “qizil” hudud maqomini oldi. Biroz vaqt o‘tib viloyatda koronavirusdan kasallanganlar ko‘rsatkichi yuqorilagach, viloyat sog‘liqni saqlash boshqarmasi 127 nafar bemor Uzbekistan GTL zavodi qurilishidagi quruvchilar ekanligini ta’kidladi. Qashqadaryo hokimi esa oilaviy tadbirda ishtirok etgan hamda deputatlar bilan uchrashgan shifokor 30 nafar fuqaroga koronavirus yuqtirganini ochiqlagandi.
Izoh (0)