Taniqli san’atkor Ozoda Nursaidova Sardoba fojiasidan jabrlangan 5 ta oilaga Toshkent viloyatining Ohangaron tumanidagi ko‘p qavatli uylardan 5 tasini sovg‘a qilgani haqida xabar berilgandi.
“Daryo” muxbiri Mirolim Isajonovning qayd etishicha, uyli bo‘lgan oilalar orasida minglab fuqarolar singari jabr ko‘rgan cho‘pon Zafar Qurbonovning ham oilasi bor.
“Men 15 yil birovning uyida ijarada yashab, cho‘ponlik qildim. Kutilmagan talafot sabab olti yilda zo‘rg‘a pul yig‘ib, qurgan uyimdan ayrildim. O‘sha fojia yuz berganidan keyin kuchli ruhiy holatga tushib, farzandlarim kelajagi haqida chuqur qayg‘urdim. Ikki oydan beri biror joyda ishlab, bir so‘m pul topmadim. Chunki qo‘lim ishga bormadi, xayolimda uy-joy qilish, avvalgi baxtli hayotimga qaytish edi.
Ozoda Nursaidovaning tashabbusi nafaqat meni, balki oila a’zolarim, qarindosh-urug‘larimni ham quvontirdi. Biz buni kutmagandik ochig‘i. Kelgusida mana shu 3 xonali uyda yaqinlarim bilan yashamoqchimiz.
Mol boqib, podachilik qilishdan oldin boshimdan ko‘p qiyinchiliklarni o‘tkazganman, tirikchilik sabab turli ishlarni qilganman. Qisqasi, qo‘limdan hamma ish keladi. Bizni mahalla vakillari yangi ish bilan ta’minlashlarini eshitib, yanada xursand bo‘ldim. Barchadan yaratgan rozi bo‘lsin”, — dedi Zafar Qurbonov.
Eslatib o‘tamiz, may oyida Zafar Qurbonov “Sevimli TV” telekanalining “Zamon” informatsion dasturiga intervyu bergan va unda toshqin takrorlanishidan qo‘rqayotgani va Sirdaryodan boshqa yerga ko‘chib ketmoqchi ekanligi haqida gapirib, Sardoba falokati oqibatlari xususida so‘z yuritgandi.
Shuningdek, 14-mayda Ozoda Nursaidova tadbirkor Akbar Anvarov bilan birgalikda Sardoba falokatidan jabrlangan 5 ta oilaga Toshkent viloyatidan 5 ta uy sovg‘a qilishi haqida Instagram orqali ma’lum qilgan.
Izoh (0)