Inson huquqlari bo‘yicha milliy markaz bo‘lim boshlig‘i Oybek Ahmatov Xalqaro press-klubning 1-iyul kuni bo‘lib o‘tgan navbatdagi sessiyasida Andijonda fuqaroning ichki ishlar xodimlari tomonidan qiynoqlarga solinishi holatidan kelib chiqib o‘z takliflarini berdi. Bu haqda “Daryo” muxbiri Musulmonbek Ibrohimov xabar bermoqda.
Oybek Ahmatov birinchi galda, mamlakatdagi bunday holatlar favqulodda holat sifatida qabul qilinishi zarurati borligini bildirdi.
“Ikkinchidan, bundan buyon bu kabi har bitta holatning kelib chiqish sabablarini chuqur o‘rganish va tub ildizlarigacha yetib borishni yo‘lga qo‘yish kerak. Uchinchidan, Oliy sudga Jinoyat kodeksining 235-moddasini (Qiynoqqa solish va boshqa shafqatsiz, g‘ayriinsoniy yoki qadr-qimmatni kamsituvchi muomala hamda jazo turlarini qo‘llash) odil sudlov jarayonida qo‘llash amaliyotini umumlashtirish tavsiya etiladi”, — dedi milliy markaz vakili Ahmatov.
Uning qo‘shimcha qilishicha, inson huquqlari, erkinliklari va qonuniy manfaatlariga bevosita daxldor sohalarda ishlaydigan hamda xizmat vazifasini olib boradigan barcha toifadagi kadrlarni inson huquqlari sohasi bo‘yicha o‘qitish shart.
Mavzuga doir: O‘zbekistonda huquq-tartibot idoralari rahbarlari inson qadr-qimmatini hurmat qilish bo‘yicha o‘qitiladi
Izoh (0)