Xonanda Ozoda Nursaidova Sardoba falokati oqibatida uyidan ayrilgan 5 ta oilaga Toshkent viloyatidan 5 ta xonadon hadya qildi. Bu haqda u Instagram’dagi sahifasida ma’lum qildi.

Foto: Instagram / @ozodaofficial

“Sardoba falokati oqibatida aholining ko‘p qismi talafot ko‘rdi. Odamlar evakuatsiya qilindi, davlat rahbari o‘sha yerga yetib bordi. Bu yoqda butun xalq jipslashib, jabrlangan aholiga qo‘lidan kelgan yordamini berdi, haligacha beryapti. Mana saxovat karvonlari tashkil etildi, go‘dakdan tortib yoshi katta fuqarolarimizgacha yordamini ayamadi. Hatto pensionerlarimiz pensiyasining tiyin tiyinigacha sardobaliklarga xayriya qildi.

Biz ham mana shu xayriya aksiyalaridan ta’sirlanib, tadbirkor, saxovatpesha ukam Akbar Anvarov bilan birga o‘zimiz aksiya tashkil qildik. Sardoba falokatidan aziyat chekkan 5 ta oilaga Toshkent viloyatidan uy sovg‘a qilyapmiz. Ya’ni 3 ta uch xonali, ikkita ikki xonali uy.

Bu uy, albatta, vaqtinchalik emas, uy o‘zlariga qoladi. Uylarni hadya qilyapmiz-u, lekin biroz kamchiligi bor. Oilalarning uylarga kelib yashashi uchun texnika, jihozlar kerak bo‘ladi. Masalan, muzlatkich, gilam, televizor va boshqa zarur narsalar. Agar ularga yordam berish istagida bo‘lgan ko‘ngillilar bo‘lsa, biz xursand bo‘lamiz”, — deydi Ozoda Nursaidova.