O‘zbekiston va Jahon savdo tashkiloti iyul oyidan mamlakatning mazkur tashkilotga a’zo bo‘lishi bo‘yicha qo‘shma ishchi guruh uchrashuvlarini qayta boshlaydi. Bu haqda Investitsiyalar va tashqi savdo vazirligi xabar berdi.
Ma’lum qilinishicha, 2020-yilning 29-iyun kuni O‘zbekiston bosh vazirining o‘rinbosari — investitsiyalar va tashqi savdo vaziri Sardor Umurzoqov rahbarligida Jahon savdo tashkiloti bilan ishlash bo‘yicha Idoralararo komissiyasining 4-yig‘ilishi videokonferensiya shaklida o‘tkazildi. Tadbirda O‘zbekistonning JSTga kirishi bo‘yicha muzokaralar olib borish guruhi a’zolari ham ishtirok etdi.
O‘zbekistonning JSTga a’zo bo‘lishi bo‘yicha ishchi guruh 1998-yilda tashkil etilgan edi. Keyingi yillarda ushbu ishchi guruh faqat uch marta uchrashdi va 2000-yillarning o‘rtalariga kelib bu borada xalqaro ekspertlar bilan uchrashuvlar to‘xtab qolgandi.
Uchrashuv davomida O‘zbekistonning JSTga kirishi bo‘yicha ishchi guruhining bo‘lajak 4-yig‘ilishi bilan bog‘liq masalalar muhokama qilindi.
“Hozirgi kundagi epidemiologik vaziyatni hisobga olgan holda, O‘zbekiston Respublikasining JSTga kirishi bo‘yicha ishchi guruhining 4-yig‘ilishi 2020-yilning 7-iyul kuni “gibrid” shaklida o‘tkazilishi, ya’ni Jenevadagi xorijiy davlatlarning diplomatik missiyalari delegatsiyalari tashkilot shtab-kvartirasining majlislar zalida, ekspert guruhlari esa, shu jumladan, O‘zbekiston delegatsiyasi, videokonferensiya orqali ishtirok etishiga kelishib olindi”, — deyiladi vazirlik xabarida.
Vazirlikning qayd etishicha, JSTga a’zo bo‘lish jarayoni muhim vazifa ekanligi va mamlakatni ijtimoiy-iqtisodiy rivojlantirishning bir qator omillariga ta’sir etuvchi masalalar majmuasini tezkor hal etishni talab qilishi alohida ta’kidlandi.
Avvalroq O‘zbekistonning Jahon savdo tashkilotiga a’zo bo‘lishi uchun idoralararo komissiya tuzilgandi.
Izoh (0)