Inson huquqlari bo‘yicha milliy markazi bo‘lim boshlig‘i Oybek Ahmatov mas’ullardan Xalqaro press-klubning navbatdagi sessiyasida Andijonda fuqaroning ichki ishlar xodimlari tomonidan qiynoqlarga solinishi bo‘yicha jinoyat ishini ochiq o‘tkazilishini qat’iy talab qildi. Bu haqda “Daryo” muxbiri Musulmonbek Ibrohimov xabar bermoqda.
Oybek Ahmatovning ma’lum qilishicha, Inson huquqlari bo‘yicha milliy markaz Andijonda sodir bo‘lgan holatni qat’iy nazoratga olgan. Markaz 12-iyundayoq ushbu holat yuzasidan qo‘zg‘atilgan jinoyat ishi bo‘yicha olib borilayotgan tergov harakatlarini shaxsan nazoratga olishni so‘rab O‘zbekiston Bosh prokurori va ichki ishlar vaziriga rasmiy xat bilan murojaat qilgan. Bundan tashqari, markaz xodimi 18—19-iyun kunlari Andijon viloyatiga tashrif buyurib, marhumning oila a’zolari, prokuratura va ichki ishlar boshqarmasi va boshqa tashkilotlarda uchrashuvlar tashkil qilgan.
Mavzuga doir: IIV Andijonda IIB xodimlari qiynoqlaridan vafot etgan fuqaro ishi yuzasidan uzr so‘radi
Aybdorlar haqli va muqarrar jazosini olishi shart. Kecha O‘zbekiston Prezidenti ushbu fojiali holat bo‘yicha o‘z fikrlarini bildirib, ishni adolatli va shaffof ko‘rish yuzasidan ko‘rsatmalar berdi.
Inson huquqlari bo‘yicha milliy markaz adolat to‘liq qaror topishini inson huquqlarini poymol qilish holatlariga butunlay barham berilishini va bunday fojialar boshqa takrorlanmasligi uchun barcha imkoniyatlarni ishga soladi”, — dedi markaz vakili.
Eslatib o‘tamiz, Andijon shahar ichki ishlar organlari xodimlari tomonidan fuqaroning kaltaklangani natijasida vafot etishi ortidan Inson huquqlari bo‘yicha milliy markaz direktori Almal Saidov Oliy Majlisning Inson huquqlari bo‘yicha vakili Ombudsmanning mintaqaviy vakiliga nisbatan tanqidiy fikrlar bildirgandi. Ombudsman o‘z navbatida Akmal Saidovning tanqidiga javob qaytargandi.
Andijondagi voqea sababli fuqaroning vafot etgani ma’lum bo‘lgach, Inson huquqlari bo‘yicha milliy markaz fuqaroning IIB tomonidan qiynoqqa solinganini qat’iy qoralagandi.
Izoh (0)