O‘zbekistondagi davlat organlari madaniyatli va qonun doirasida ishlashni o‘rganishi kerak. Bu haqda Senatning navbatdagi yalpi majlisida adliya vaziri Ruslanbek Davletov ma’lum qildi.
Adliya vaziri amaldorlarni “blogerlar ortidan quvmaslikka” va to‘g‘ri ishlashga chaqirdi.
“Har bir masalaning huquqiy yechimi bor. Noto‘g‘ri axborot tarqatgan yoki kimgadir tuhmat qilgan bo‘lsa, tegishli tartibda hal qilishni o‘rganishimiz kerak. Davlat idorasi o‘zining qarashini bildirishi kerak. Har bitta blogerning aytgan gapi uchun quvib yurib bo‘lmaydi. Bugungi kunda axborotni jilovlay olmaymiz. Shuning uchun iloji boricha tarqatilayotgan ma’lumotlardan to‘g‘ri xulosa qilib, qonun ustuvorligi va ochiqlikni ta’minlab, zamonaviy ishlashga o‘tishimiz kerak”, — deydi vazir.
Ruslanbek Davletovning ta’kidlashicha, bundan buyon axborot maydonida hech qanday cheklov bo‘lmaydi. Buni O‘zbekiston Prezidenti ham katta siyosiy irodasi sifatida namoyish qilmoqda.
Vazirning so‘zlariga ko‘ra, agar davlat idoralari ishida qonun ustuvorligiga erishilsa, boshqa muammolar o‘z-o‘zidan hal bo‘ladi.
“Davlat idoralarida qonun ustuvorligi masalalari bo‘yicha ishlashimiz kerak, kuch bilan emas. Bu oddiy mexanizm. U butun dunyoda sinovdan o‘tgan, natijalar ham bor. Ming yillik tarix bilan tasdiqlangan. Formulasi ham aniq, boshqa formulalar, boshqa yondashuvlar kerak emas, velosipedni qayta ixtiro qilish shart emas. Oliy qonunchilikka rioya qilish kerak, bu kimgadir yoqmasa ham. Chunki har kim o‘ziga yoqqan ishini qilaversa, jamiyat parokanda bo‘ladi”, — deydi Davletov.
Izoh (0)