Ўзбекистондаги давлат органлари маданиятли ва қонун доирасида ишлашни ўрганиши керак. Бу ҳақда Сенатнинг навбатдаги ялпи мажлисида адлия вазири Русланбек Давлетов маълум қилди.
Адлия вазири амалдорларни «блогерлар ортидан қувмасликка» ва тўғри ишлашга чақирди.
«Ҳар бир масаланинг ҳуқуқий ечими бор. Нотўғри ахборот тарқатган ёки кимгадир туҳмат қилган бўлса, тегишли тартибда ҳал қилишни ўрганишимиз керак. Давлат идораси ўзининг қарашини билдириши керак. Ҳар битта блогернинг айтган гапи учун қувиб юриб бўлмайди. Бугунги кунда ахборотни жиловлай олмаймиз. Шунинг учун иложи борича тарқатилаётган маълумотлардан тўғри хулоса қилиб, қонун устуворлиги ва очиқликни таъминлаб, замонавий ишлашга ўтишимиз керак», — дейди вазир.
Русланбек Давлетовнинг таъкидлашича, бундан буён ахборот майдонида ҳеч қандай чеклов бўлмайди. Буни Ўзбекистон Президенти ҳам катта сиёсий иродаси сифатида намойиш қилмоқда.
Вазирнинг сўзларига кўра, агар давлат идоралари ишида қонун устуворлигига эришилса, бошқа муаммолар ўз-ўзидан ҳал бўлади.
«Давлат идораларида қонун устуворлиги масалалари бўйича ишлашимиз керак, куч билан эмас. Бу оддий механизм. У бутун дунёда синовдан ўтган, натижалар ҳам бор. Минг йиллик тарих билан тасдиқланган. Формуласи ҳам аниқ, бошқа формулалар, бошқа ёндашувлар керак эмас, велосипедни қайта ихтиро қилиш шарт эмас. Олий қонунчиликка риоя қилиш керак, бу кимгадир ёқмаса ҳам. Чунки ҳар ким ўзига ёққан ишини қилаверса, жамият пароканда бўлади», — дейди Давлетов.
Изоҳ (0)