Shu yilning 5-yanvar kuni dang‘aralik 1962-yilda tug‘ilgan marhum K.Y. o‘ziga tegishli bo‘lgan Cobalt avtomashinasida Qo‘qon—Toshkent yo‘nalishi bo‘ylab kira qilish maqsadida yashash xonadonidan chiqib ketib qaytib kelmagani, keyinroq fuqaroning jasadi Angren daryosi qirg‘og‘idagi chakalakzordan topilgani to‘g‘risida xabar qilingandi. Toshkent viloyati Ichki ishlar bosh boshqarmasi hamda prokuratura xodimlari tomonidan olib borilgan qidiruv-surushtiruv ishlari davomida mazkur jinoyat ishi fosh etilgani ma’lum qilindi.
Ushbu jinoyat 1998-yilda tug‘ilgan, mehribonlik uyi tarbiyalanuvchisi U.Y. tomonidan sodir etilganiga yetarli ma’lumot va dalillar to‘planib, Jinoyat kodeksining 97-moddasi (Qasddan odam o‘ldirish) 2-qismi “i” bandi bilan gumon qilinuvchi tariqasida jalb qilingan. Gumonlanuvchi U.Y. aybiga iqrorligini o‘z arizasida bayon qilgan.
Ma’lum bo‘lishicha, gumonlanuvchi 5-yanvar kuni soat taxminan 22:40 larda Ohangaron shahriga Toshkent—Qo‘qon yo‘nalishi bo‘yicha harakatlanuvchi taksilar avtoturargohiga borgan. Shu yerda u marhum K.Y. bilan Farg‘ona viloyatining Beshariq tumaniga olib borib qo‘yishini aytib, u bilan kelishgan va yo‘l-yo‘lakay Ohangaron tumanidan oqib o‘tuvchi Angren daryosi yaqinidagi mahallalardan biriga kirib o‘tishlarini ma’lum qilgan.
Shundan so‘ng ular belgilangan daryo yaqiniga borgan vaqtida gumonlanuvchi yonida bo‘lgan temir bo‘lagi bilan dastlab haydovchining bosh qismiga bir necha marotaba urib, keyin esa uni mashinadan tushirib yerdagi tosh bo‘lagi bilan urib hushidan ketkizgan. So‘ng haydovchining cho‘ntagida bo‘lgan pul va uyali telefonni olayotgan vaqtida haydovchi hushiga kelib baqirmoqchi bo‘lganida yonida oldindan tayyorlab qo‘ygan pichog‘i bilan haydovchining old ko‘krak va orqa sohasiga bir necha marotaba urib, tan jarohati yetkazgan.
Keyin esa haydovchining murdasini avtomashinaga joylab, “Telov” MFY hududidan oqib o‘tuvchi Angren daryosi yaqiniga olib borgan va uning ust kiyimlarini yechib, tanasidagi barmoq izlarini suv bilan yuvib pastlikka tashlab yuborgan.
Jinoyat izlarini yashirish maqsadida haydovchining ust kiyimlari, qo‘l telefoni va o‘zining barmoq izi teggan barcha buyumlarni, mashinaning zaxira baloni, pichoq va temir bo‘lagini suvga otib yuborgan. Avtomashinani esa Ohangaron shahar “Yangiobod” mahallasi hududida qoldirib, voqea joyidan yashiringan.
Shuningdek, surushtiruv davomida gumonlanuvchi U.Y.ning Ohangaron va Olmaliq shaharlarida sodir etgan boshqa jinoyatlari ham fosh etilib, Ohangaron shahar IIB TB tomonidan unga nisbatan Jinoyat kodeksining 169-moddasi (O‘g‘rilik) 1-qismi bilan jinoyat ishi qo‘zg‘atilgan. Ehtiyot chorasi sifatida qamoqqa olingan.
Hozirda mazkur jinoyat ishlari yuzasidan dastlabki tergov harakatlari olib borilmoqda.
Izoh (0)