Farg‘ona IIB So‘xda respublikada yagona bo‘lgan xorijga chiqish pasportini rasmiylashtiruvchi sayyor xizmatni yo‘lga qo‘ydi

So‘x aholisiga qulaylik yaratish maqsadida Farg‘ona viloyati IIB tomonidan tajriba tariqasida xorijga chiqish pasportini rasmiylashtirish sayyor xizmati yo‘lga qo‘yildi, deya xabar berdi “Daryo” muxbiri Azizbek Ermatov.

Respublikada yagona bo‘lgan mazkur sayyor xizmat turi “Gazel” avtomashinasiga joylashtirilgan bo‘lib, malakali mutaxassislar va barcha zarur texnik qurilmalar bilan ta’minlangan.Ushbu xizmat nogironligi bo‘lgan, keksa yoshdagi hamda tuman markazidan olis hududlarda yashovchi fuqarolar uchun mo‘ljallangan.

Qayd etilishicha, har kuni xorijga chiqish biometrik pasportini rasmiylashtirish bo‘yicha 70 nafarga yaqin fuqaroga migratsiya xizmati ko‘rsatilmoqda.

Eslatib o‘tamiz, avvalroq ishchi guruh tomonidan So‘x tumanida olib borilayotgan ishlar to‘g‘risida ma’lumot berilgandi.