Yangi Zelandiyada masofadan turib ishlayotgan xodimlarni kuzatishga mo‘ljallangan dastur yaratildi

Yangi Zelandiyadagi PRAAS startapi rahbarlarga masofadan turib ishlayotgan xodimlar uyidagi printerda nimani chop etayotganini kuzatish imkonini beradigan servisni ishga tushirdi. Dastur biror-bir kompaniyaga tegishli maxfiy ma’lumotlar tarqalib ketishining oldini olishga qaratilgan, deb xabar beradi Business Insider.

Ma’lum qilinishicha, mazkur dastur har qanday model va markadagi printerlarda ishlayveradi.

“Xodim ofis yoki uyidagi ishchi kompyuteri orqali biror nimani chop etsa, tizim avtomatik ravishda faylning nusxasini IT bo‘limga yuboradi. Bu esa maxfiy ma’lumotlarni kuzatish imkonini beradi”, — deydi PRAAS bosh direktori Brendon Frensis.

Loyiha mualliflarining hisoblashicha, ularning startapi ko‘plab ish beruvchilarda qiziqish uyg‘otadi, chunki aksariyat kompaniyalar o‘z xodimlarini masofadan turib ishlatmoqda. PRASS mutaxassislarining hisob-kitobiga ko‘ra bu — 20 millionga yaqin kuzatilmaydigan printerlar demak.

Kompaniya o‘z servisini joriy haftada Microsoft Azure bulutli platformasida ishga tushiradi.