Oliy Majlis Senati raisi Tanzila Norboyeva 19-iyun, juma kuni o‘tkazilgan beshinchi yalpi majlis davomida joylardagi senatorlarning jamiyatda ro‘y berayotgan jarayonlar va qizg‘in muhokama qilinayotgan masalalarni jim kuzatishini, shuningdek, deputatlarning xalq bilan muloqotga kirishmasligi, ularning odamlardan o‘zini olib qochishini tanqid qildi.
Uning aytishicha, hududlardagi senatorlar, deputatlar “muammolar portfeli”ni tuzib, markazdan ishchi guruhi kelishini kutib o‘tirmasdan muammolarni Senat yoki mahalliy Kengash muhokamasiga kiritib borishi kerak.
“Biz hududlarga chiqqanda ijro organlari yoki boshqa tuzilmalar vakillaridan ishchi guruh tuzib, muammo axtarib yuribmiz. Aslida hududlardagi senatorlarimiz, deputatlarimiz bizni ‘muammolar portfeli’ bilan kutib olishi yoki markazdan ishchi guruhi kelishini kutib o‘tirmasdan muammolarni Senat yoki mahalliy Kengash muhokamasiga kiritib borishi kerak emasmi?! Buning uchun vakolatlar yetarli-ku!” — dedi u.
Tanzila Norboyeva ijtimoiy tarmoqlarda muammolarni hamma muhokama qilayotganda, munosabat bildirayotganda senatorlarni “jim” turishini tanqid qildi.
“Ijtimoiy tarmoqlarga kirib ko‘ring, har kuni bir muammo, ichki ishlar xodimi kimnidir kaltaklagan, u o‘lib qolgan, qaysidir hokim tadbirkorga zug‘um qilgan, kimlardir majburiy mehnatga jalb qilingan, qayerdadir firibgarlar odamlarni ommaviy aldagan, chegara hududlardagi aholini yillar davomida to‘planib qolgan muammolar qiynab kelyapti. Mana shunday holatlarni yana ko‘plab sanash mumkin. Bunday muammolarni hamma muhokama qiladi, munosabat bildiradi, xulosalarini aytadi. Lekin o‘sha joylardagi senatorlarimiz jim, ulardan aks-sado ham chiqmaydi”, — deya qayd etdi Senat rahbari.
Uning so‘zlariga ko‘ra, senatorlar qachonki ularga topshiriq berilsa, borib xabar olsin, deyilsagina boradi va shundan keyingina shug‘ullana boshlaydi. “Aslida unday bo‘lishi kerak emas. Yaxshiyam ijtimoiy tarmoqlar bor ekan, hozir bizga hamma muammolarni ochiq-oydin ko‘rsatib beryapti”, — deydi u.
Tanzila Norboyeva ijtimoiy tarmoqlarda ko‘tarilayotgan muammolar bo‘yicha tizimli ishlash bo‘yicha choralar belgilansa va bu borada “mas’ullar, ayniqsa, senatorlar mas’uliyatini oshirsa, xalqimiz kutgan ish bo‘lar edi”, deb qo‘shimcha qildi.
Izoh (0)