«Яхшиям ижтимоий тармоқлар бор экан, ҳозир бизга ҳамма масалаларни очиқ-ойдин кўрсатиб беряпти» — Танзила Норбоева

Олий Мажлис Сенати раиси Танзила Норбоева 19 июнь, жума куни ўтказилган бешинчи ялпи мажлис давомида жойлардаги сенаторларнинг жамиятда рўй бераётган жараёнлар ва қизғин муҳокама қилинаётган масалаларни жим кузатишини, шунингдек, депутатларнинг халқ билан мулоқотга киришмаслиги, уларнинг одамлардан ўзини олиб қочишини танқид қилди.

Унинг айтишича, ҳудудлардаги сенаторлар, депутатлар «муаммолар портфели»ни тузиб, марказдан ишчи гуруҳи келишини кутиб ўтирмасдан муаммоларни Сенат ёки маҳаллий Кенгаш муҳокамасига киритиб бориши керак.

«Биз ҳудудларга чиққанда ижро органлари ёки бошқа тузилмалар вакилларидан ишчи гуруҳ тузиб, муаммо ахтариб юрибмиз. Аслида ҳудудлардаги сенаторларимиз, депутатларимиз бизни ‘муаммолар портфели’ билан кутиб олиши ёки марказдан ишчи гуруҳи келишини кутиб ўтирмасдан муаммоларни Сенат ёки маҳаллий Кенгаш муҳокамасига киритиб бориши керак эмасми?! Бунинг учун ваколатлар етарли-ку!» — деди у.

Танзила Норбоева ижтимоий тармоқларда муаммоларни ҳамма муҳокама қилаётганда, муносабат билдираётганда сенаторларни «жим» туришини танқид қилди.

«Ижтимоий тармоқларга кириб кўринг, ҳар куни бир муаммо, ички ишлар ходими кимнидир калтаклаган, у ўлиб қолган, қайсидир ҳоким тадбиркорга зуғум қилган, кимлардир мажбурий меҳнатга жалб қилинган, қаердадир фирибгарлар одамларни оммавий алдаган, чегара ҳудудлардаги аҳолини йиллар давомида тўпланиб қолган муаммолар қийнаб келяпти. Мана шундай ҳолатларни яна кўплаб санаш мумкин. Бундай муаммоларни ҳамма муҳокама қилади, муносабат билдиради, хулосаларини айтади. Лекин ўша жойлардаги сенаторларимиз жим, улардан акс-садо ҳам чиқмайди», — дея қайд этди Сенат раҳбари.

Унинг сўзларига кўра, сенаторлар қачонки уларга топшириқ берилса, бориб хабар олсин, дейилсагина боради ва шундан кейингина шуғуллана бошлайди. «Аслида ундай бўлиши керак эмас. Яхшиям ижтимоий тармоқлар бор экан, ҳозир бизга ҳамма муаммоларни очиқ-ойдин кўрсатиб беряпти», — дейди у.

Танзила Норбоева ижтимоий тармоқларда кўтарилаётган муаммолар бўйича тизимли ишлаш бўйича чоралар белгиланса ва бу борада «масъуллар, айниқса, сенаторлар масъулиятини оширса, халқимиз кутган иш бўлар эди», деб қўшимча қилди.