Sardoba suv toshqini sabab yopilib qolgan Toshkent—Samarqand yo‘lining Oqoltin tumani hududidan o‘tgan A-373 avtomobil yo‘li 13-iyundan transport vositalari uchun ochilgani, ushbu yo‘l orqali sutkaning yorug‘ vaqtida harakatlanish mumkinligi haqida xabar berilgandi. “Kun.uz”ning yozishicha, mazkur yo‘l yana yopilgan.
Sirdaryo viloyati IIB YHXB axborot xizmati rahbari Javlon Toshboyevning ma’lum qilishicha, yo‘lning toshqindan zarar ko‘rgan qismidagi to‘rtta ko‘prikning faqat bir tomoni ochiq. Shu bois bu hududlarda bir taraflama harakat yo‘lga qo‘yilgan.
Bildirilishicha, qurilishlar davom etayotgani, g‘alla o‘rimi boshlangani sababli yirik texnika ham bu yo‘lga tushgan, shuningdek, ayni shu kunlarda karantin qoidalari ham qisman yumshatilgani sababli bu yo‘lda tirbandlik haddan ortiq kuchayib ketdi. Dastlab, bir taraflama harakat hududlarida avval bir yo‘nalishni o‘tkazib, ikkinchi yo‘nalishni to‘xtatib, harakat tartibga solib turildi. Ammo soatlab tirbandlikda turib qolish baribir noqulayliklar tug‘dirdi, haydovchi va yo‘lovchilarning o‘zi ham issiqda qolib, noroziliklar bildirdi.
Shu sababli masofa uzoqroq bo‘lsa ham tranzit avtomobillar uchun Dashtobod—Zarbdor—Jizzax yo‘nalishida harakatlanish maqsadga muvofiq degan xulosaga kelingan.
Ayni paytda yo‘lning ta’mirlanayotgan qismida faqat qurilishlarda ishlayotgan transport vositalari, mahalliy aholiga tegishli va g‘alla o‘rimiga jalb qilingan avtomobillar harakatiga ruxsat berilgan. Yo‘l tranzit avtomobillar uchun ochilishi muddati bo‘yicha qo‘shimcha axborot beriladi.
Eslatib o‘tamiz, Oqoltin tumani hududidan o‘tgan M-34 avtomobil yo‘li bilan Guliston yo‘nalishi bo‘yicha o‘tgan yo‘lni bog‘lab turuvchi A-373 xalqaro ahamiyatdagi avtomobil yo‘liga 1-may kuni Sardoba suv ombori to‘g‘onining yorilishi oqibatida zarar yetgandi. Shu bilan birga, ushbu suv toshqini sabab Sardoba, Mirzaobod va Oqoltin tumanlaridagi xalqaro, davlat va mahalliy avtomobil yo‘llari, yo‘l ko‘priklariga ham jiddiy zarar yetib, transport vositalarining harakatlanishi cheklangan edi.
Avvalroq Sirdaryoda suv toshqinidan zarar ko‘rgan 26 kilometr yo‘lga asfaltobeton yotqizilgani to‘g‘risida xabar berilgandi.
Izoh (0)