Сардоба сув тошқини сабаб ёпилиб қолган Тошкент—Самарқанд йўлининг Оқолтин тумани ҳудудидан ўтган А-373 автомобиль йўли 13 июндан транспорт воситалари учун очилгани, ушбу йўл орқали сутканинг ёруғ вақтида ҳаракатланиш мумкинлиги ҳақида хабар берилганди. «Kun.uz»нинг ёзишича, мазкур йўл яна ёпилган.
Сирдарё вилояти ИИБ ЙҲХБ ахборот хизмати раҳбари Жавлон Тошбоевнинг маълум қилишича, йўлнинг тошқиндан зарар кўрган қисмидаги тўртта кўприкнинг фақат бир томони очиқ. Шу боис бу ҳудудларда бир тарафлама ҳаракат йўлга қўйилган.
Билдирилишича, қурилишлар давом этаётгани, ғалла ўрими бошлангани сабабли йирик техника ҳам бу йўлга тушган, шунингдек, айни шу кунларда карантин қоидалари ҳам қисман юмшатилгани сабабли бу йўлда тирбандлик ҳаддан ортиқ кучайиб кетди. Дастлаб, бир тарафлама ҳаракат ҳудудларида аввал бир йўналишни ўтказиб, иккинчи йўналишни тўхтатиб, ҳаракат тартибга солиб турилди. Аммо соатлаб тирбандликда туриб қолиш барибир ноқулайликлар туғдирди, ҳайдовчи ва йўловчиларнинг ўзи ҳам иссиқда қолиб, норозиликлар билдирди.
Шу сабабли масофа узоқроқ бўлса ҳам транзит автомобиллар учун Даштобод—Зарбдор—Жиззах йўналишида ҳаракатланиш мақсадга мувофиқ деган хулосага келинган.
Айни пайтда йўлнинг таъмирланаётган қисмида фақат қурилишларда ишлаётган транспорт воситалари, маҳаллий аҳолига тегишли ва ғалла ўримига жалб қилинган автомобиллар ҳаракатига рухсат берилган. Йўл транзит автомобиллар учун очилиши муддати бўйича қўшимча ахборот берилади.
Эслатиб ўтамиз, Оқолтин тумани ҳудудидан ўтган М-34 автомобиль йўли билан Гулистон йўналиши бўйича ўтган йўлни боғлаб турувчи А-373 халқаро аҳамиятдаги автомобиль йўлига 1 май куни Сардоба сув омбори тўғонининг ёрилиши оқибатида зарар етганди. Шу билан бирга, ушбу сув тошқини сабаб Сардоба, Мирзаобод ва Оқолтин туманларидаги халқаро, давлат ва маҳаллий автомобиль йўллари, йўл кўприкларига ҳам жиддий зарар етиб, транспорт воситаларининг ҳаракатланиши чекланган эди.
Аввалроқ Сирдарёда сув тошқинидан зарар кўрган 26 километр йўлга асфальтобетон ётқизилгани тўғрисида хабар берилганди.
Изоҳ (0)