Жиззах вилояти Ғаллаорол туманидаги «Сангзор-15» йўл-патруль хизмати масканида 15 июнь куни Тошкент шаҳрига олиб кетилаётган 1679 килограмм сифатсиз гўшт тўхтатиб қолинди. Бу ҳақда Ички ишлар вазирлиги хабар берди.
Маълум қилинишича, 15 июнь куни Жиззах вилояти ИИБ ходимлари томонидан Kia Bongo русумли юк машинаси тўхтатиб текширилганида, унинг юкхонасида тегишли ҳужжатлари бўлмаган 1679 килограмм гўшт олиб кетилаётгани аниқланди.
Суриштирув давомида Қашқадарё вилояти Косон туманида яшовчи 1988 йилда туғилган ҳайдовчи гўштни Тошкент шаҳрида номаълум шахслар қабул қилиб олиши кераклигини, лекин маҳсулотнинг нима мақсадда ишлатилишини билмаслигини маълум қилган.
Қайд этилишича, қоп ва полиэтилен халталарга жойланган қўланса ҳидли ушбу гўшт таркибидан бирорта ҳам суяк топилмаган. Бу эса гўштнинг қайси ҳайвонга мансублигини аниқлашни қийинлаштиради. Аммо маҳсулот қорамол, қўй ва эчкига тегишли эмас, деган хулосага келинган.
«Аслида ташилаётган ҳар қандай гўшт ветеринар кўригидан ўтказилиши ва бу тўғрисида маълумотнома берилиши лозим. Яъни ветеринар этнинг сифатли экани, вируслар билан зарарланмаганини кафолатлаши шарт. Шунингдек, гўшни етказиб берувчи ва олувчи тадбиркорлик субъектлари ўртасида шартнома тузилиши зарур», — дейилади вазирлик хабарда.
ИИВ хабарида бир қатор кимёвий тозалашлардан сўнг энг сифатсиз гўштни ҳам тайёр ёки ярим тайёр маҳсулотга айлантириш мумкинлиги таъкидланган.
Айни вақтда гўшт Жиззах шаҳридаги музхонада сақланмоқда. Мутахассислар маҳсулотнинг сифатини аниқлаш, хусусан, касаллик уйғотувчи омиллар бор-йўқлигини текширмоқда. Якунда сифатсиз гўштларни йўқ қилиш кўзда тутилган.
Вазирлик томонидан маълум қилинишича, аввалроқ Зомин туманидаги «Яккабоғ-15» йўл-патруль хизмати масканида ҳам пойтахтга олиб кетилаётган 1710 килограмм сифатсиз гўшт тўхтатиб қолинган.
Изоҳ (0)