Xorazm viloyatida tadbirkorning avtomobillarga yoqilg‘i quyish shoxobchasini avtomobillarga siqilgan gaz to‘ldirish kompressor stansiyasiga aylantirish uchun zarur hujjatlarni rasmiylashtirish masalasini hal qilib bermoqchi bo‘lgan shaxs tadbirkordan 45 ming dollar so‘radi. Bu haqda “O‘zbekiston 24” telekanalining “Axborot 24” dasturida ma’lum qilindi.
Xabar berilishicha, Xorazm viloyati Urganch tumanida yashovchi tadbirkor o‘ziga tegishli bo‘lgan avtomobillarga yoqilg‘i quyish shoxobchasini rekonstruksiya qilish yo‘li bilan avtomobillarga siqilgan gaz to‘ldirish kompressor stansiyasiga aylantirish uchun tegishli hujjatlarni joriy yilning yanvar oyida viloyat hokimligiga taqdim etgan.
Biroq hozirgacha uning masalasi hal etilmaganidan xabar topgan uddaburon shaxs go‘yoki hokimiyat idoralaridagi tanishlari orqali uning muammosini hal qilib berishini aytib, evaziga 45 ming dollar so‘ragan.
DXX Xorazm viloyati boshqarmasi va viloyat prokuraturasi xodimlari tomonidan o‘tkazilgan tezkor tadbirda mazkur shaxs tadbirkordan 44 ming dollar olayotgan vaqtida ushlangan.
Avvalroq Toshkent viloyatida 60 ming dollarga yer sotmoqchi bo‘lgan tuman hokimi o‘rinbosari qo‘lga olingani, Toshkent viloyatida harbiy qism mayori 3 ming dollar pora bilan ushlangani haqida xabarlar berilgandi.
Mavzuga doir:
- Farg‘onada qurilish obyektini olib berishi evaziga 5 ming dollar so‘ragan qishloq xo‘jaligi hisobchisi firibgarlik ustida ushlandi
- Marhamatda tadbirkorlik uchun yer ajratib berish evaziga 4 kishidan 8250 dollar olgan shaxs ushlandi
- Muborakda tadbirkorning 150 mln so‘mini qo‘lga kiritgan firibgarga nisbatan jinoyat ishi qo‘zg‘atildi
- Andijonda elektr hisoblagichdagi “kamchilikni yopib berish” uchun 400 dollar so‘ragan shaxs qo‘lga olindi
Izoh (0)