Angliyaning Blekpul shahrida yashovchi o‘smirlar marhum bobosining omborini yig‘ishtirayotib Ikkinchi jahon urushi davriga oid bomba va boshqa qurollarni topib oldi. Bu haqda The Sun xabar berdi.
18 yoshli Elli Ferklo bobosining omborini yig‘ishtirmoqchi bo‘ldi. Unga sevgilisi 21 yoshli Keyn Devis ham yordamlashayotgandi.
Yoshlar tashlab yuborilishi kerak bo‘lgan chiqindilarni bir joyga to‘pladi. Shu payt ular g‘ayrioddiy sumkani payqashdi. Uni ochishganida ichida uzunligi taxminan yetti santimetr bo‘lgan Ikkinchi Jahon urushi paytida ishlatilgan bombani ko‘rishdi. Devis shu zahotiyoq topilma haqida mahalliy politsiyaga xabar berdi.
Voqea joyiga yetib kelgan politsiyachilar yaqin atrofdagi uylar aholisini evakuatsiya qildi.
“Bu juda ahmoqona vaziyat edi. Hamma qo‘shnilar shokka tushdi. Bizdan bomba portlagudek bo‘lsa, zararlanmaslik uchun uzoqroqdagi ko‘chaga borib turishimizni aytishdi”, — deydi Ferklo.
Qizning aytishicha, bomba katta ehtimol bilan marhum bobosining kolleksiyasiga mansub bo‘lgan. U Ikkinchi jahon urushiga oid buyumlarni yig‘ardi.
Mutaxassislarning aniqlashicha, bombaga yarim asrdan beri hech kim teginmagan. Hozirda u Buyuk Britaniya armiyasining moddiy-texnik ta’minot korpusida saqlanmoqda. U mutaxassislar tomonidan o‘rganilmoqda.
Izoh (0)