Англиянинг Блэкпул шаҳрида яшовчи ўсмирлар марҳум бобосининг омборини йиғиштираётиб Иккинчи жаҳон уруши даврига оид бомба ва бошқа қуролларни топиб олди. Бу ҳақда The Sun хабар берди.
18 ёшли Элли Фэркло бобосининг омборини йиғиштирмоқчи бўлди. Унга севгилиси 21 ёшли Кейн Дэвис ҳам ёрдамлашаётганди.
Ёшлар ташлаб юборилиши керак бўлган чиқиндиларни бир жойга тўплади. Шу пайт улар ғайриоддий сумкани пайқашди. Уни очишганида ичида узунлиги тахминан етти сантиметр бўлган Иккинчи Жаҳон уруши пайтида ишлатилган бомбани кўришди. Дэвис шу заҳотиёқ топилма ҳақида маҳаллий полицияга хабар берди.
Воқеа жойига етиб келган полициячилар яқин атрофдаги уйлар аҳолисини эвакуация қилди.
«Бу жуда аҳмоқона вазият эди. Ҳамма қўшнилар шокка тушди. Биздан бомба портлагудек бўлса, зарарланмаслик учун узоқроқдаги кўчага бориб туришимизни айтишди», — дейди Фэркло.
Қизнинг айтишича, бомба катта эҳтимол билан марҳум бобосининг коллекциясига мансуб бўлган. У Иккинчи жаҳон урушига оид буюмларни йиғарди.
Мутахассисларнинг аниқлашича, бомбага ярим асрдан бери ҳеч ким тегинмаган. Ҳозирда у Буюк Британия армиясининг моддий-техник таъминот корпусида сақланмоқда. У мутахассислар томонидан ўрганилмоқда.
Изоҳ (0)