Shveysariya politsiyasi 8 yoshli bola qishloq do‘konida o‘yinchoq pul bilan to‘lovni amalga oshirish mumkinmi yo‘qmi, deb so‘raganidan so‘ng uni 12 yilga qoidabuzarlar bazasiga kiritdi, deb yozmoqda The Local Switzerland.
Ma’lum bo‘lishicha, bola aprel oyi oxirlarida 10 yoshli akasi va qo‘shni qizcha bilan mahalliy qishloq do‘konlaridan biriga kirgan va o‘yinchoq pul bilan to‘lovni amalga oshirsa bo‘ladimi, deb so‘ragan.
Pul soxta ekanligi ko‘rinib turganiga qaramay, do‘kon xodimlari politsiya chaqirtirgan. “Bu bizning vazifamiz, soxta pul muomilaga kiritishga urinishning har qanday holatda shunday yo‘l tutishga ko‘rsatma berilgan”, — degan do‘kon menejeri.
Basler Zeitung’ning qayd etishicha, boladagi pul oddiy qog‘ozda chop etilgan yevro banknotasi bo‘lib, unda xitoycha iyerogliflar bosilgan. Bunday pullarni xitoyliklar “marhumning qabrdagi hayoti muvaffaqiyatli kechishi uchun” dafn marosimlarida yoqib yuboradi. Guardian’ning yozishicha, bunday pullar mart oyida Shveysariyaning Sissach kommunasida o‘tkazilgan karnavalda tarqatilgan, bola uni ehtimol o‘sha vaqtda olgan bo‘lishi mumkin.
Bolaning uyidan ham 10, 20 va 50 yevro qiymatdagi shunday soxta kupyuralar topilgan va “jinoyatning oldini olish maqsadida” olib qo‘yilgan.
Bolaga nisbatan ayblov qo‘yilmagan, lekin politsiya uni advokatlar ishtirokisiz so‘roq qilgan va jinoyatchilarni suratga olgandek rasmga olgan hamda u haqdagi ma’lumotlarni politsiya bazasiga kiritgan.
Keyinchalik do‘kon ma’muriyati yuz bergan voqea yuzasidan uzr so‘ragan va bolalarga politsiya chaqirish o‘rniga shunchaki ogohlantirish berish kerakligi xayollariga kelmaganini ta’kidlagan. Do‘kon menejerining aytishicha, xodimlarining birortasining farzandlari yo‘q.
Izoh (0)